بِیڑی پتہ؟
ایہہ کیہ ناں ہویا رُکھ دا
جھڑیا پتر میں چایائے
کوئی ویلا ہا بِیڑی عام آہی
ماڑا جیہا تماکو چُونڈھی سُکّے پتر وِچ ولیا
ہاری ساری دے وارے
بٹوے وال ای ڈبی سِگٹ کوئی گِھندا ہا
گولڈ فلیک تھری کاسلز ہووے بھاویں قینچی تار ہووے
سنتُو ڈاکیئے بِیڑی دے گُن گِننے
“ایہہ نقصان نہیں کرنی
سِگٹ تے باہروں اشنائے
دُکھوں جُڑیا دُکھ نا دارُو ایہہ اساں کی گھرنا
ننگیاں پٹاں تے پَتر کھول تماکو جیہڑیاں بھرنیاں نیں
سَو بِیڑی بھر پیسہ اِک دیہاڑی اوہ گھر کھڑنیاں نیں
ایہہ پیسے نی اِک بزاریں آ وِکنی جے
کرو ہاں لیکھا
کھول پڑھو ایہہ چِٹھی اساں نی بِیڑی نی”
گل سنتالیوں اگے دی میں یاد کریندا پَتر نوں تکناں
اِک ہتھ لمّا اِک ہتھ چَیڑا
بالاں والی سُر وِچ کُویائے
“چِٹھی ہتھ ای سنتُو والی
دے سورج نوں کھول پڑھاوے تینوں
میں سُن پَتر سورج ساہویں کرناں
اندر جال اے ٹاہن ٹاہنیاں
لگراں وِچوں پَر لگراں
پسّر پتّر دھرتی اندر نظراں نوں نِت چھاہندیاں نیں
ہر ٹہنی ہر لگّر رُکھ ہے وکھ ہو جُڑیا
رُکھو رُکھ ہے پَتر جنگل وِتھ ویہل نہیں کائی
گَھن واہ ورتن میل سمیل ہے
کُل بھرپور ہے تُھڑ چھیک نہیں رائی
وت ویکھناں
کھیس مہین اُنِیندا فرشوں عرشاں تائیں
ہر تند دی تان ہے وکھری تاہیوں بُنت ہے سنگھنی
وت ویکھناں
وِچو وِچ دریا پیا وگدائے باہیں نہراں کر دو پاسیں کڈھدا
کھالاں آڈاں انگلاں وِچوں سردا پانی
ساوی پِیچ وِچوں
ہرئیل اکھیاں پھیر جھاتدائے،
نہیں
ایہہ پتّر کنڈھیاں اُپر ورھیاں سِجھ1 پان دِیاں کنیاں نیں
چوا موری جُڑ نالے تھیاں
نیں ہو نیں رلیاں نیں
سورج اگوں لاہ میں پَتر نوں پچُھناں
“صاحب جے تُوں ہیں نشان جہان دا
تاں ایس جگ وِچ باندھ ہے کُھل نہیں
رُجھ ہی رُجھ ہے ویہل نہیں کائی
کار چوں کار نِکلدی آوے
کھیڈ نظر نہیں آئی”
بالاں والا ہاسا ہسیائے
“میں جہان ہاں
تیرے جہان دا میں نشان نہیں
باندھ کُھل نہ کار کھیڈ
نہ میں رُجھ نہ ویہل
روح سریروں وکھ وی کِدھرے ڈِٹھی آ
بُھوت پریت تاں ویہندا ای رہنائیں
سپ کُنج وکھری ہوندی آ جد سپ نِکل گیا ہووے”
ہتھوں مینڈے نِکل کے گھاہ تے بازی ماردا پَتر کُوکیائے
“ولدا گھل سنتُو نوں
چِٹھی پُج گئی او تے”