میں کِھج کھئور نال بُھونڈ نوں کُہنی چھنڈ ہٹایا
اوہنے وکھیوں چُونڈھی آن وڈھی
پِیڑ نال کِھج ہور ودھی
''ہُن سوج پے جانی اے''
اخبار ولھیٹ ہتھیار بنایم
بھالاں چوپھیرے بُھونڈ نظر نہ آوے
گُھٹ کَوڑ دا بھر اخبار میں کھول لئی
کُجھ چِر مگروں نظر فرش تے پئی
گھسی اِٹ دے ٹوٹے چ پانی کٹھا ہویائے
اوہ بیٹھا کنڈھے تے گُھٹ بھرے،
پَھس گیائیں نا
لاہ لے تریہہ میں سِجھناں تینوں،
چنگا جھٹ لنگھیا
جاں ویکھاں اوہ پانی وِچ جہاز ترے
میں ہتھیار تولیا
مُڑ سوچناں
اج دی اے اخبار گلی ہو جاسی
چِھٹاں وکھریاں فرشی، کپڑیاں اُتے،
چھڈ یار
تیرے جیہے چَتر جی نال آڈھا لاون
کوئی مخول دی گل نہیں،
کُرسی پرے کر، دھر اخبار پریرے بیٹھم
اَوہڑی:
ڈنگ تے ہوئی تیری بولی یار
گل بھیتلی آکھ گیائیں:
''اساں کدن ساں ویری او مِترا
رِیت چموڑی کِھج کھار تُوں گاکھ گیائیں''