میلہ ہا
دوروں دوروں خلقت آئی
دادے میڈے اعلان کرایا
میں پِتّل پیسے نوں
نیزے نال کِلّے توں چاء کے وائیں وگاساں
تے پُھنڈ دیساں مُڑ پستول دے فائر نال
پورا میلہ ڈُھک پیا
لوک دی ہاہا کار
دادا میڈا گھوڑی بھجیندا
پگ دا طُرہ واء دے وچ پُھرکیندا
اُڑیا کِلّے کول
نیزے دی اَنی نال
گول پِتل دا پیسہ
ایڈورڈ روڈے دی مُورت والا
اُپر اُچھالیا
کھبے ہتھ دے جھٹکے نال پستول وگائی تے پُھنڈ دِتوس
پئی کہاء
وڈ وڈیر امراء رؤسا
پڑدادے مینڈے دے ڈیرے آئے
بِھیڑ لوک دی
شور مبارک
اخیر فتح مند شاہسوار میڈا دادا
وڈے ادب نال پیو دی حضوری آیا
شابس گِھنن کیتے نِوَیا
پیو آکھیا فتح علی
ایتنی دُھوڑ اُڈائی کھلا ایں
اپنے آپ نوں ویکھن جوگی وِتھ وی رکھ لویں ہا
فتح علی جَھوں نیویں پا کے ٹُردا
نال آئیاں نوں پچھانہہ موڑدا
من راوی تے آ نِکلیا
رات آئی
اک چھابا چائی ویندی کولوں آکھ گئی
“اپنا آپ اوہ پِتل پیسہ ای ہا
پُھنڈک جو نِکل پیائیں”
فتح علی اوہدے مگر جان دی کردا
اجھک گھر پرت پیا