لاٹ صاحب دے دفتر توں لاء
گھر تیکر اوہ آوندی سی
اگوں سِدھی تِیر
چھاونی میاں مِیر نِکل اوہ جاوندی سی
(جیویں ہُن جاندی اے)
اِٹّاں دی روڑی کُٹ وچھائی
گرمی سردی مَشک ترونکا
ٹھنڈی سڑک اکھواندی سی
رتھاں وگدیاں سن
توڑو توڑ کھلہاریونیں سانوں پال پاسنے،
ساہ کُسَیلے چھڈے اوہناں رتھواناں دے
وِچ ہڈاں دے لاہیئے،
تت صدیاں دی داب دا
گُھٹ گُھٹ کڈھ پِوائیے شامیں،
مَڑھ مَل امبیا1 ہکار2
مُڑ اسوار کرائیے چڑھدے دینہہ تے-
روڑی پٹیجی
ٹھنڈی تتی سڑک پکیجی
رتھاں گئیاں کاراں آئیاں
پِیڑھیو پِیڑھی کر کر اوہا کار
ہڈ ساڈے ہار گئے