چھاویں بہنا جے کہ بالن لینا جے
اساں تَن تروَر
ترن ہار
ورن ہار
اساں پنکھ پروار
شجر درخت ٹری1 کر ٹالے جیہڑے سکولاں،
ماسی پُھپھی مامے چاچے
بھین بھرا وی دِھیاں پُتر وی آپے
آپے افسر عملہ فِیلہ
گھر دفتر وی آپے
پَین سِرو سِر چھاپے،
جُگ جُگ نک مُونہہ ٹوہ تساڈے
پُھل پَھل رس رسایا
اساں اکھ کن جِبھ لُوں لِنگ یُونی
سِنگ جیہناں نے چایا ایہہ سنسار،
ہوئے ڈھیر بزار
ہتھ ہو اپنا آپ وِکایا
مِلاں گیڑیاں مالاں2 بھرائیاں
مُڈھوں وڈھیجے سڑکاں کُھلیاں کرائیاں،
جِت ہار بُھکھ سُکھ اساں ہاں
وار اساں ہاں اپنی تساڈی
دَسّو کیہ دِل ہے
چھاویں بہنا جے
کہ بالن لَینا جے