لئو پھیر دھریکاں پُھلیاں جے
ہر واریں اوہا کم ! ایہناں نوں سنگ نہیں
ورھیاں بدھیں
سُرک بھوئیں دا تت ست پُور بھریندیاں نیں
واء مَیل نوں سُرج سیک نوں
کھرل سرل کر ناڑِیں چیتر چاڑھن ہریا
سٹ پشوازاں ساڑ سواہ تن مارن ورھے چھماہیں
جوگ بھوگ کر ایڈے
مُڑ مُڑ ذات صفات پُرانی دوار دھریندیاں نیں
اوہا رنگ سُگندھ وی اوہا
ہکا کم تھیں ہاں ایہناں دا تنگ نہیں؟
ٹوک مینڈی سُنگھ کِھلیاں کاسنی بُلیاں جے:
''اکھ پروکی تینڈی وی نہیں
اُرانہہ کریں نا
نویں اساں رَل کرئیے
تینوں بھیت اجوکا پوہے''