''اسوار تے آہدائے
گھوڑا میری میں گھوڑے دی بولی سمجھناں
پر سچ پچھو اسوار نِری تلوار دی بولی سمجھدائے
گھوڑا بولی سمجھن لئی کوئی گھاہ ہووے تاں ہووے
تے گھاہ بولی نوں گھوڑا ہو کے سمجھ کوئی نہیں سکدا
گھاہ بولی نوں سمجھن لئی کوئی پانی ہووے واء ہووے تاں ہووے''
''تسیں پوری عمر اسوار رہے
ایہہ گل تہانوں سمجھ کیویں آئی''
''بس کوئی ویلا آوندائے
اسوار دے وِچ تلوار تے ہے پر گھوڑا وی ہے
گھوڑے اندر گھاہ وی ہے
گھاہ دے اندر پانی وی ہے واء وی ہے
کِس دی بولی سُن سمجھدائے کوئی
بس کوئی ویلا آوندائے
وِچ والے دی سمجھے جوئی
اوہا آپ نوں پاؤندائے''