‘‘یا خواجہ
اج ایہہ گل تے کھولو
کیوں چَس شراب دی لوڑ اساڈی بن گئی
کدیں سوچناں خبرے ہے ای ضروری
یا مجبوری
وڈکے میرے وی گُھٹ رُڑی دا لا کے
ججماناں دیاں کُھوہاں تے لوک نوں دُلّے دی وار سناوندے آئے’’
‘‘شیخُو پیارے
ایہہ ہے ساڈی گھڑی انند دی
کیوں ایہنوں متھا رگڑائیے
چھڈ جھگڑے
گُھٹ لا ہور
مور ویلے دا لُوں لُوں پَیل پیا پاوندا ای’’
‘‘یا خواجہ
اُستاد تسیں ہو
ادب پڑھایا کُل جہان نوں
سالو سالو سال نِت نواں کرایا
دل دی لوح نوں سُرت قلم نوں،
میں اخبارِیا1
سچ کُوڑ دی لُکن مِیٹی
1 -اخبارِیا: اخبار نویس، جرنلِسٹ-
فِلم بنا کے روز وکھاوناں،
دوئے اسیں شِکھر تے ہاں
ناں ناویں دی تھوڑ تہانوں نہ مینوں
کموں نکل کے پارٹی دفتر آونے آں
نویں بناونے آں
اندر باہر بدل دین دے نقشے
پِنڈاں شہراں وِچ پا کے پھیرے
کرنہاراں دے ساہ وِچ ساہ رلاونے آں،
ترے گھنٹے اشنان سکَوچ دا کیتے بنا
کیوں نیندر پیر نہیں دھردی سیج اساڈی تے
بولویا حضرت خواجہ’’
‘‘ترے گھنٹے شرابے روڑھن دا تینوں سَلھ پیا کھوردائے
شیخو پیارے
بند کر اندر لگی کچہری
گُھٹ لا ہور’’
‘‘جج وی ساڈے تُسیں ہوئے یا خواجہ
مقدمہ میرا ای نہیں
ہُنے ایہہ کمرہ بھر جانائے
انقلاب کا ساحل لاہ کے باہر بُوہے تے
اندر آئیاں اکھیاں نے کوئی ہور سمندر تر جانائے’’
‘‘شیخو پیارے
کم بھاویں پڑھن پڑھاون دا ہووے
اخبار چلاون پارٹی دفتر جاون دا ہووے
گھر گھر پِھر کھڑکاون دا ہووے وجیاں دِلاں دیاں کُنڈیاں
کم کم ہے
عشق عشق ہے
ایہہ اِک نہ ہوئے نہ ہو سکدے نیں
کم سوگ ہے عشق بھوگ ہے،
سانوں پُرانیاں سُگھڑ اشرافاں ہار
رکھِیاں گھراں توں پرے رکھیلاں چکھیاں بنا
نہیں چَس عشق دی آ سکدی’’
‘‘رکھیل ہوندی تے سودا ای ہا یا خواجہ
ریڑھی ریڑھی رِجھدی بھاجی
پھڑ سَٹ دیگ ولِیمی وِچ اشراف پُرانے
دم نِت دیندے آئے
پر سَودے وِچوں
ہتھاں ہزاراں دی
سِلّھ سُک دا بو خشبو دا بھیت تے نہیں نہ جاندا
ستیں ویہیں سَو والے تڑکے لگن پئے
اوہا بھیت ہو بھوگ واشنا
اشرافاں دے مُودھے پئے ہتھیار کھلہاردا آیا جے
نہیں یا خواجہ؟’’
‘‘شیخو پیارے ایہہ ہے گل پرانی
ہے سیانی بھاویں
ہوندی آئی اے صدیاں توں، ہوندی رہنی اے
ایس ویلے توں چھیڑی اے جیہڑی اوہ مُکا لے
وچے لگی نہ جاوے’’
‘‘اودھر ای پیا آوناں مُرشد تہاڈی واہی لِیکے لگ کے
جد تائیں کم کیتا اساں
بَن بالن بھاویں چُلھا بگانا تاون دا
بھاویں مال بگانا چُک دھر آپوں مِلکھ ہو جاون دا
کم کم ای رہیا
ویہلے ہونا جا رکھیل دے ٹبّ وِچوں گُھٹ نِرت بھاؤ دا بھرنا
عشق دی تَس بُھگتا لینی،
جد سُنیا اساں
مال مِلکھ نوں جڑوں پٹن دا کم ای عشق ہے اصلی
تُرت ایہدے ول ہوئے
سانوں چَس بھوگ دی آئی کوئی نہ
کم کم ای رہیا
اوکھا ہوندا گیا دِنو دِن
سانوں ٹبّ رکھیل دا اندر اپنے ڈاہنا پیا’’
‘‘گل پُرانی نویں کہانی کر چھڈی او شیخُو لاڈلیا
ہُن ادیب توں ہویا پیائیں
اخبار نویسی عینک میرے متھے لا کے،
چَس بھوگ وِچ قدرت جیہڑی پائی
اوہ نویں اُگاس دی تَس ہئی
کم ساڈے دا ٹِیچا نویں اُگاس ای ہا
پر واہن راہن دے کشٹ چوں سانوں
واس اُگاس دی آئی کوئی نہ
نک بند آہے خبرے سَودے سُنگھ سُنگھ کے،
نہ ہتھ وترے
نہ بھوئیں پِیچی
رَڑھ1 پھوگ بھوگ دی گاہ ایہہ تن پسمائے اساں،
چھڈ جھگڑے شیخُو
بُل تے سُکے تر کر بَھیڑیا
گھڑی انند دی گل نے تیری گوا دِتی او
پھیر آوے نہ آوے
خبرے’’
‘‘بُل سُکے ای اج رہن دیویا خواجہ
وٹ دو گھڑیاں دا سہن دیو
خوشی چاہے کوئی بدلی پھیرا پاوے’’
1 - رَڑھ= فصل، راہی-