فرید بھنڈار

(سرگھی نوں جیویں سُنائی سَیدو پھپھے کُٹن)

دھری ہوئی سُو آلے میرے وِچ ستار اُچھاڑ چڑھا

کدیں کدار ای آون ہونا

کھول ستار ایہنے بہنا کُجھ چِر

مُڑ گھڑی ویکھ دھر آلے کم تے نِکل جانا،

پک کریندا آیا اے ہمیشہ

سَیدو باجی تُسیں پِنڈاں وِچ رَل لوکاں نال

گاوندے او گاون سیاسی

ستار میری نے وی نال جانا جے

اپنا حصہ پانا جے،

ضرور جمالی، آکھ میں چھڈنا

ایس آس تے، ویکھو کم ایہنوں ویہل دیوے تے،

کم اُسرَگّے ڈَولن دا اے سرگھو

پیو ایہدے نوں شوق سی چِترکاری دا

سنگیت دا

کہانی جوڑ لِکھن دا

اوہدی ڈاکٹری اوہنوں ویہل نہ دِتی

پُتر دا اوہا اُلار ویکھ اوہنے آکھیا

کم تُوں اوہا کرنائے جیہڑا آرٹ ہووے،

پڑھی اُسار سار1 ایہنے آرٹ سکولوں 

دفتر کھولیا

سرکاری بلڈنگاں ہسپتال تے سکول کالج

کم ڈھیر مِلیائے

چوکھا کمائیس ناں ناواں 

چِراں پِچھوں اج آیائے سرگھو

مُونہہ لمکیا

ڈِھڈ ودھیا،

'کیوں جمالی باہر گیا ہویا سَیں کِدھرے؟'

'نہیں 

پر ایتھے نہیں میں 

خبرے کِتھے آں 

کِسے چیز وِچ دِل نہیں لگدا

ڈِپریشن انت دا

دوائیاں نال وی فرق نہیں کوئی'

'ستار جمالی؟'

'دِل نہیں کردا سَیدو باجی، بالکل نہیں'

'چل دھکا ای سہی اج دِل نال

ستار نوں ویکھ تے لے اِک واری کپڑے لاہ اوہدے'

تھوڑا جیہا مُسکایا جُھوٹھا سچا

لاہی ستار آلے چوں 

کھولی، تار چھیڑی، سُر کیتی

'چِراں پِچھوں اج تکی او جمالی

ڈَھل گئی اے کُجھ ویلے نال؟'

ہسیائے، نہیں 

اوویں دی اوویں دھن جوبن

ڈِھڈ ودھیائے نہ مُونہہ لمکیائے

'آہندی او تُوں وی لاہ کپڑے

آ رلِیئے سنبھوگیں چِٹے دینہہ'

چھیڑی گیائے راگاں نوں ٹوہندا سُر پوہندا

آہندائے ہُن میں روز سویلے آونائے جیویں وی ہووے،

لؤ جی سرگھو

روز سویلے آوندائے

گھنٹہ لاوندائے

دُوجا ہفتہ اے

اج اُٹھیائے وجا کے باہر میرے کول آیائے

'سَیدو باجی میں جوڑے تہاڈے گاون سُنے نیں سارے

مالکونس وِچ نہیں تہاڈی طرز کوئی

پنج سُرا اے تاں کر کے؟'

'اسیں کیہ جانیئے پنج سُرے نیں کیہڑے جمالی

تے کیہڑے ست سُرے'

'سَیدو باجی دانے ہوندے نیں راگ

تہاڈے جیہاں نوں اندرے اندر ای

کھول وکھیندے نیں اپنا آپ،

مالکونس وِچ آکڑ بڑی اے:

بارھاں سُراں والی بھیرویں وِچوں پنج کڈھ میں کھلوتا ہاں 

ایہہ جے خودی میری

کِتھے نار او کِتھے میں نر،

ہیٹھو ہیٹھ کِتے روسا وی سُو کاوڑ رَتّا

وکھ مینوں کیوں کیتونیں 

بھیرویں وِچ تے میں دی چِھٹ نہیں کوئی

میرے مگروں میں ایہہ لہندی ای نہیں 

آہی دی ناہی ہُن کیویں ہووے'

'سمجھ رلائی اے ہُن جمالی تیرے ویروے

کلا کم کیویں بن ویندی اے،

کم کلا تاں ہونا اے

جِس ویلے

سُر سارے

سَت ہوندیاں اِک ہوئے'

1- اُسار سار= تعمیر دا علم، آرکی ٹیکچر-