سرنگئیے سن استاد ہوریں
شاعری وی کردے سن
پر کدیں پھڑائی نہیں نیں دِتی شعر کیہڑائے تے گل کیہڑی اے
ٹُر گئے جِس راتیں
شامیں مِلے نیں نظم سُنایو نیں
ہُن رلی مِلی گل یاد اے شعر نہیں رہندے چیتے
اکھے بندے کیوں چڑھدے نیں
بندیاں کُرسیاں کاراں اُتے
سنچریاں کیوں کردے نیں
رنزاں رناں دِیاں
پِنڈیاں نوں سنھاں دیاں
کیوں کڈھدے نیں اخباراں
کیوں پِھردے نیں ادھ جاگے ادھ سُتے
شاعری کیوں کردے نیں
وِک وِک نویاں ہوون لئی
سرگھی کوڑا ڈھوون لئی
نہ ہوون دے ڈر توں بھجدے اوسے گھر کیوں وڑدے نیں -
اکھے آپ سیانے او
تسیں دسو
ہسو اوئے ایہہ وی تے شاعری اے
ایہدے وِچ وی تے اوہو ساریاں گلاں نیں
میاں پڑھن والے تے پڑھدے نیں -
اکھے آپ سیانے او
شاعری جوڑ اے
جوڑ کھول کے تک لؤ
اوہو ساریاں وِچ نیں تے پھولو، کڈھ دیو
جو رہ جائے سو رکھ لؤ
توڑے چُپ اے
جیہڑی نہ ہوون توں چُھٹ ہوون وِچ وڑ گئی
پورھیا کردیاں انگلاں چوں نِکلی
دُھرل مناراں نوں چڑھ گئی
آپ سیانے او اکھے تکو چھاں اے دُھپ اے
کیہڑی چُپ اے کُجھ نہ کہنی
کیہڑی چُپ گڑُپ اے-
ماپیاں دھریا ناں ہور ہا سُنیائے
شعر جواہری ناں تے آپنے پڑھدے سن
آپے دسدے سن استاد ہوریں:
ہیریاں والا جواہری نہیں ایہہ
توڑے ہیرا منڈی بہندائے،
وجدیاں تاراں ہیٹھ جواہری ہوندی اے
بجلی دی وی تار جواہریوں لنگھدی اے