فرید بھنڈار

''دِل کم کیویں کریندا اے

نہیں سچ، دِلڑی، کیویں کم کریندی اے''

''ایہہ تُسیں دساؤ،

سانُوں تے دماغ دی سار اے

اوہ وی تھوڑی جیہی''

چلو، اوسے دی دس پواؤ''

''سُچیت

ادھ چیت

اچیت''

''چھڈ تے نہیں گئے کُجھ وِچوں؟''

''کیہ''

''کُچیت''

''ہَیں، اوہ کیہ''

''لائن جیہدے تے گڈّی چلدی اے''

''کیہڑی''

جِس تے چڑھ کے سامِیاں کم کریندیاں نیں''

''کیہڑا''

''فرسٹ سَیکنڈ وِچ بہہ کے آپِیں

رُک رُک تھاؤں تھائیں

اِنٹر تھرڈ دے ڈبّے ساتھوں بھریندیاں نیں،

جیہدے تے شک پوے ذرا جیہا

اوہنوں جیل دے ڈبّے جمع کریندیاں نیں

بے ٹِکٹا کر کے''

''تفریق آکھو نا''

''سامی1 سکُولاں وِچ

تفریق نُوں جمع

تقسیم نُوں ضرب ای کر کے

پہلی توں دسوِیں تِیکر پڑھایا جاندا اے،

اگانہہ پڑھائی ایس حساب نُوں ہور برِیک کریندی اے''،

''آہو، کم کار جو ایسے دے سِر تے چلنا ہویا''

''کم کار نہ آکھو''

''آہو، وگار غُبار''

1- سامی= اُپرلے میل دے، مالک، ملکھوان-