کلی پہلی
واری: بھلا ہووے جے
آپے آکھدے او کائی وار سُنا
نالے پُچھدے او وار ایہہ ہوندی کیہ اے
وار اوہ جو ورتی
پر ورتی خلقت دی ہور، سائیاں ڈاڈھیاں دی ہور
کیہڑی وار سُنسو
سُننا اوہائے تُساں جیہڑا وارا کھاوے
کیوں؟ سُنن سُنن ای نہیں
سُنن کرن وی اے
سُنن جیون وی اے سُنن مرن وی اے
آکھن والیاں وی اوہا آکھنا اے
رہندا رہ جانائے
ہیٹھو ہیٹھ کِدھرے وَیہندا وَیہہ جانائے
تاریخ
ہِسٹری
وار سرکار والی
اصل وچ کتاب اے ضابطے دی
پڑھن پیاں دے سِراں تے کسدے نیں
پئے جَھسدے نیں وچ ماڑا ماڑا تیل کچیاں پکیاں کہانیاں دا
وار اُرار ای نہیں وار پار وی اے
جیہڑی ورتدے او ورتنہار وی اے
کیہڑی وار سُنسو
چلو وار چھڈو، بات پاونے آں
چِڑی چِڑے دی
چِڑیاں وچ چِڑے کدیں انج آہے
ہُن جیوں بندیاں وچ تریمتیں نیں
مُڑ کوئی سَوڑ پئی
وکھو وکھرے آہلنے پَین لگے
چِڑیاں سَلھدیاں کجدیاں ڈرن لگیاں
چِڑے کہن لگے تُسیں اندرے رہو
اساں نِبڑنے آں
سو اوہ چِڑیاں دے خاوند سداون لگے
آن اوہناں دی خودی بلند ہوئی
ساڈی بات وی سمجھو تدوکنی جے
ہِک چِڑے سہرے گانے والی سادی چھوڑ کے تے
نیلے رنگ دی چڑی پرنا آندی
سادی شوہدڑی رنگ رنگاون نکلی
آپنے کھمب لُوہ لئے
ہانناں سُنی تاں اوہناں دے کھمب جھڑ گئے
رُکھ چِڑیاں توں سُنی سُندیاں سار سُکا
نَیں رُکھ توں سُنی سُندیاں سار سُکی
خبر شہر پُجی
خبرے کیویں پُجی
تدوں اُردو اخباراں تے آہن کوئی نہ
ہٹی والے نے سُن بھاء ہور دا ہور کوئی بول دِتا
تول ہور دا ہور کوئی تول دِتا
گولی ہیٹوں سُن ملکہ کول پہتی
ملکہ سُنی تے سُن کے اُٹھ نچی
وت نچدی گئی تے نچدی گئی
نچدیاں رات پے گئی
وت دینہہ چڑھیا وت رات پَے گئی
ملکہ نچدی کنوں باتشاہ سُنی
سُن ہسن لگا
وت ہسدا گیا تے ہسدا گیا
ہسدیاں دینہہ چڑھیا
وت رات پَے گئی وت دینہہ چڑھیا
سُنی تُساں وی ہوسی
پر ہُن تے وڈکیاں نوں پِچھلیاں بُھل گئیاں نیں
یاد اوہا رہندائے جیہڑا وارا کھاوے
رہندا رہ جاندائے
اُتھاں لہہ جاندائے
جِتھوں بُھلیاں ہونیاں بندیاں نیں، بن چڑھدیاں نیں
ہِلا بئی کھڈکارو سُوجھوانو
سَوں تے نہیں گئے
کیویں لالی بنیندی اے وار دی بات تے بات دی وار
وکھاؤ تاں سہی
لالی بالڑی اے
ساہ لئو، آوندی اے
شہر سویر
چمکیلا آرٹ ڈائرز
وڈے بزار دے راہ وچ ای ایہہ مھند للاری دی ہٹی اے جی
تریہاں چالیہاں ورھیاں دا مھند ہونائے
کُونڈا اندر پیا پکدائے رنگ والا
اندروں کدیں کدیں دُھوں نکلدا اے
مھند: (ہیک)"فقر بھارڑے گورڑے ہو رہیئے کُڑی چِڑی دے نال کَھرکَھسیئے کیوں"
ہک بالڑیاں اُتوں دکانداری
پِھٹے مُونہہ ای مھند چمکیلیا اوئے
پِھٹے مُونہہ ای بئی
اوہو رہیوں نہ ذات کُذات وِچوں
ہان دی ہوئے تے گل وِی اے
آہو، ہان دی ہوئے تے گھان ہو جائے
کیتا ککھ وی نہیں
رنگ ہوراں نوں آپ بد رنگ ہو گئے
نالے ہتھ نِیلے نالے پَیر کالے
پَیر نہیں مُونہہ کالا
ویہندا ای رہیں
تماش بِین پیو دا
لوکیں ویہندیاں ویہندیاں ہور ہو گئے
پُترا اکھ وچ نوٹ سریش ہووے
جیہنوں دیکھیں چموڑ لئیں
ٹی وی والِیاں کیہ فلم والِیاں کیہ
وِیزا لگ جائے نہ، تاں کِل کِل مُکدی آ
لے بئی آئیاں نی
فقر بھارڑے گورڑے ہو رہیئے، فقر بھارڑے گورڑے
بھارڑے گورڑے
واری: کُڑیاں ہُم ہُما کے آئیاں جے- باراں چوداں ورھیاں دا ای ہان ہوسی- پندراں سولاں دا آکھ لئو- کُڑیاں ودھدیاں دیر تے لاوندیاں نہیں ہِک نِکڑی جاتکڑی مگر، لالی (''جا نی کھیڈ جا کے'' جیہنوں آکھیدائے "چمبڑی رہندی اے پُوچھ بن کے")
ہِک: اج مار پئی او
مھند: فالتو گل دی لوڑ کوئی نہیں- لیٹرے دیو تے پُھٹو
اینویں دھیاں دھیانیاں بَھوندیاں نہیں
ہِک: سچی مار پئی سُو
صوفی بنن لگائے
مھند: میں آکھیا نہیں فالتو گل نہ کر
رنگ دسو تے جاؤ، اج کیہ اے بُدھ، اِک بُدھ چھڈ کے اگلے بُدھ آیو
ہِک: رنگ دسن للاری دا کم ہوندائے
مھند: للاری یار ای کھسم ای؟
جیہدا مال اے آپنا رنگ دسے
گھروں پُچھ کے آؤ ماواں ماسیاں نوں
ہِک: گھروں جاپدائے جُتیاں کھادیاں سو
ہِک: وڈا پیو ساڈا
ہِک: اسیں ہور دھرے جا رنگانیاں، آؤ، تیرا ٹھیکہ تے نہیں
ہِک: (جاندیاں) ٹُر لالی- شیشہ ویکھیا ای کدیں
واری: لالی اندروں چِڑیاں پئی تکدی اے- چِیں چِیں ہوندی اے پئی اچن چیت ہک چِڑی نوں بُک وچ لئی باہر آوندی اے
چِڑی چوں رنگ پیا چووندا اے
لالی سانبھ پُونجھیندی سُو
لالی: شُکرے اُبلیا نہیں اجے
ہِک: (دُوروں) لالی مرنیئے آ وی
ہِک: (جاندیاں) ایہدے کول نہ بہیں
ہِک: (ہور دُوروں) ہُن ایہہ رنگسی بالاں دے پوتڑے ای
مھند: گھر جا- سٹ ایہنوں روز ڈَھیندیاں نیں
لالی: تیری ہٹی وچ آہلنائے
تینوں پتہ ای کوئی نہیں
ایہہ اوہ ای کہانی والی
مھند: مینوں ویہل اے ایسلے کہانیاں دی
مار پیسی آ جا سُندی نہیں
لالی: بس میں کہانی سُنا کے جانی آں نا
ہُن کم تے تیرے کول ہے کوئی نہیں
مھند: تینوں کیہ پتہ اے
اینویں وادھو نہیں کریدیاں
جھٹا پٹ سُنا تے جا شاوا
ساڈا کم آے آڈر دا، کالجاں دا
میں کیہ جانناں ایہناں نوں، چام چِڑکاں
لالی: اِک سی تے اِک سی چِڑی
واری: نال نال پئی چڑی پلوسدی اے
لوء ہور ہوئی اے، جیویں جنگل دے وچ سویر ہووے
جنا رُکھ دے رُوپ اِک آیا اے،
کُڑی چِڑی دے رُوپ اِک آوندی اے پَر تاندی اے
کھیڈ پہل اُڈاری دی نچدی اے رُکھ نال رل کے
پوند مھند للاری ہونہہ ہانہہ کردا ایدھے اودھے مریندا اے ہتھ اینویں
کہانی واپردی دیکھ دھیان کردائے
اچنبھا تھی بہندائے ساودان سُندائے
چِڑیاں اِک توں تَرے تے تَرے توں پنج تے پنج توں ست
رل پہل اُڈاری منیندیاں وڈیاں ہو گئیاں نیں
لوء لگی اے شہر سویر والی
نہ اوہ رُکھ نہ واء
کندھاں کوٹھے چُبارے نیں ہٹیاں نیں
ہُن کُڑیاں چِڑیاں گِدھا پاوندیاں نیں
ہِک: ست رنگ چُنی تے اِک رنگ جی دا
دسو نی وانڈھے جاندیو کیہڑے گھر جانا
ساریاں: دسونی وانڈھے جاندیو کیہڑے گھر جانا
واری: ناچ مچدا اے
جَنا چِڑے دے رُوپ اک آیا اے
سِر تے پگ ست رنگی سُو
وکھرا آکڑیا لانبھے کلیل کردائے
ہِک چِڑی
ڈاروں ترُٹ کے چِڑے ول جاوندی اے
دونویں وکھرا ناچ وکھاوندے نیں
ڈار دا ناچ کُجھ کُھنجدا کُھنجدا مُک ویندائے
ڈار والیاں پاسے ہو ویہندیاں نیں
دونویں نچ کے آہلنا پاوندے نیں
پا وکھاوندے نیں
چِڑی آہلنا سانبھ سجاوندی اے
چِڑا ڈار نوں آن تراہوندا اے
کم تے لاوندا اے
ڈار ڈَور بَھوری
چوگ جوڑ کے آہلنے ڈھووندی اے
چِڑی چِڑے نوں ہس کھویندی اے پئی
گم سُم کُھلی ڈار ویہندی اے پئی
ڈاروں ہور چِڑی اِک تُرٹدی اے
اوہلے ہو کے رنگ وٹاوندی اے
نِیل چِڑی بن آوندی اے
چِڑا اوس ول ہو کلیلدا اے
اوہو ناچ پِچھلا دوئے نچدے آہلنے جاوندے نیں
پہلی چِڑی تربھک کے اُٹھدی اے
چِڑا اوہنوں ٹھنگور کے کڈھ دیندائے
نِیل چِڑی اوہدی تھاں مَلدی اے
گم سُم کَھلی ڈار ویہندی اے پئی
چِڑا آن کے ڈار تراہوندا کم تے لاوندا اے
پہلی آہلنے ول ڈردی سرکدی اے
پہلی: بَھینے
نِیلی: شکل تکی آ آپنی
ایہدی بھین جے میں، نی میں نِیل چڑی
توں عام چڑی، ویکھو شرم ای نہیں
پہلی: بی بی نِیل چڑی
اینا ای پُچھنا ہا
نیلا سُوٹ ایہہ کِتھوں رنگایا جے
نِیلی: ان پڑھے ایہہ سُوٹ نہیں
ساڈا رنگ ای ایہو اے
سَو پیڑھیاں توں اسیں نِیلیاں ہاں
پہلی: بی بی
عام چِڑی نہیں ایہو جیہی ہو سکدی؟
نِیلی: سُنو، کملی،
روا آپنا کون وٹا سکدائے
جیہڑیاں گولیاں جمیاں گولیاں نیں
پہلی: بی بی ایہہ تے پُرانیاں گلاں ہوئیاں
نِیلی: فیس لگدی او نویں سُننی آ تے
پہلی: کِنی
نِیلی: جو کُجھ پلے ای کڈھ
پہلی: پلے ہووے ہا کجھ تاں میں… میں
نِیلی: مُڑ جان چھڈ
کن پئی کھاندی اے مُفت خوری
پہلی: ساری عمر میں تینڈی غلام رہساں بھانڈے مانجساں کپڑے دھوساں تیڈے
بی بی اللہ رسول دا واسطہ جے
نِیلی: چھڈ واسطے
گنہ گار کریندی اے خامخاہ پئی
اینویں دسیا نہیں کدیں- دھیان نال سُن
دوہراساں نہوں، وچوں ٹُکیا ای تے بس
ویکھ، مھند چمکیلا پکیندائے نہ رنگ
لُک کے تاڑ رکھیں
پُورا کڑھ ونجے ڈھائی پھیرے گھتیں
ساہ چِھک لویں
اکھاں مِیٹ کے آکھیں میں واری
مینوں وی نویں کر نِیل راجہ
مینوں وی نویں کر نِیل راجہ
مینوں وی نویں کر نِیل راجہ
بس ترے واری آکھ کے گھڑم!
جدوں نِیل راجہ نِیل چاڑھ ہٹے
تھلّا چُم نکلیں
نِیل چِڑی دے مُوتر نال وت نھاویں
تینڈے جوگا میں آپنا جوڑ رکھساں
شیشہ تکسیں تے اساں نوں یاد کرسیں
واری: پہلی اُلردی اے جپھی پاونے نوں، نِیلی ترِبھکدی اے- بس بس ہٹ پِچھانہہ-
واری: جھب سنھبلدی اے
نِیلی: تینڈا عام چِڑی والا وقت تھوڑائے
سِدھی اُڈتے پہونچ
اوتنا چِر کوئی ہور نہیں کرنی سُننی، پُٹھا پَے جاندائے
پہونچ بھین مینڈی
واری: پہلی اُڈ ہٹی اُتے آوندی اے- اندر دھاوندی اے
اندروں چِیک سُنیندی اے
باہر ڈَھیندی اے آن
کھمب جھڑے پئے نیں، پِنڈا لُوس گیائے
نِیلو نِیل ہوئی اے رنگ چووندا اے
چِڑا نِیلی پئے آہلنے کِھلدے نیں
ڈار والیاں ترٹھیاں آوندیاں نیں
گھیرا گھت کے ڈھٹھی نوں چاوندیاں نیں
ہولی ہولی انھیرا