جھاکی 1
]وِیہاں دا کاکا تے پنچاہاں دا بھائیا کھلوتے گلاں کریندے نیں پئے[
کاکا: اج پتہ جے کیہ ہویا اے بھائیا جی
بھائیا: کیہ کاکا
کاکا: آکھی سجناں دی مساں گُھٹ کُو نچوڑ کے پِیتی ہونی اے اساں
ساریاں دے مُونہوں گل گل چوں واشنا ہُل دی آون لگ پئی
بھائیا: سانُوں وی سدّا اوتھے آون دا
گھل نا کاکا یار
کاکا: سدّا کیہا بھائیا جی
جو وی چاہے آ رلے
بھائیا: بھاویں وچوں کوئی کھٹاکا پٹاکہ ای ہووے بھر دھریا کسے دا
کاکا: مساں ویہہ کُو جی ہوندے نیں اُتھائیں
ہولی ہولی رلے
اِک اِک کر کے
اوہ وی آپو اپنی جائیں بیٹھے ہوندے نیں
کوئی کِتے کوئی کِتے
مُورت اگیرے کر کے اپنی
اوسے دے مُونہوں گل کریندے نیں
بھائیا: ٹھیک اے- کھڈاکا پٹاکہ تے آپا اوہلے رکھن کیتے ای ہوندا اے
میں وی آیا کہ آیا اگلے وِیروار کاکا
بھابو تیری وی آسی نال
کاکا: آہا، رَونقاں
جھاکی 2
]کاکا بیٹھا ہویا اے- بُوہا کُھلیا اے پَینتی چالیہہ دی سوانی آئی اے[
کاکا: بھابو آ گئے- بھائیا جی کِتھے نیں
بھابو: میرے نال
کاکا: تُسیں اوہناں ولّوں گل کریسو
بھابو: نہیں، اوہ میرے ولوں
کاکا: ایہہ میل نویلا اے
بھابو: کیوں، ایہو تے تُوں چیتے کرایا اے مینوں آپ
کاکا: بھابو تُہانُوں، نہیں پر،
آہو سچ، بھائیا جی تُہانُوں
بھابو: ناں، ساک تے بُوہے نیں
تُوں کاکا، میں بھابو، اوہ بھائیا،
بُوہیاں دے اندر میل ہوندا اے،
وت بُوہیوں باہر آ کے
کھیڈ اِکائی دی کھیڈیندی اے
کاکا: میں پیا کھیڈناں
آپا مِلاپا اے
بھابو: ایہہ کھیڈ اگُونہی وکھالی بن بن
پئی نِہال کریندی اے
(دوئے رل گاوندے نیں)
پچھلی کیتی ورتی دی
اساں اج پڑتال ہاں
پُن تھیاں ہاں ترُبکا ترُبکا جوڑیا پانی
دانہ دانہ کھول پکائی دال ہاں