میرے گھر پچھواڑے قبراں نیں کچیاں
قبراں دے وچ رُکھ نیں
ایہہ سرکاری سکول دا ویہڑائے
چھیویں ستویں ایتھے ای لگدی اے
میرا گھر پچھوڑا کتھے مکدائے
سکول دا ویہڑا کِتھوں تُردائے
کِنیاں قبراں کیہڑے لیکھے اوڑک لِکھیاں جان گِیاں
ایہہ اجے جھگڑائے
چھیویں والے ماسٹر ہوراں کول کدیں کدیں
اخبار پڑھن میں جا بہناں
ماسٹر ساب کتاب کھول کے سبق پڑھاوندے رہندے نیں
جو وہ کہے جو نہ کرے اسے قول و فعل کا تضاد کہا جاتا ہے
قول و فعل کے اس تضاد کو
اسلام میں نفاق کہا جاتا ہے
چھیویں دا منڈا پچھدائے
ماشٹر ساب اسیں ایہہ کیہ پڑھنے آں
ماسٹر ہوریں چنڈ مار کے آہندے نیں:
یَبڑی دیا
تینوں علم چمُونے لڑدے نیں
نالے مفتو مفتی پڑھدے او
نالے گلاں بناؤندے او اُتوں
پھیر جھٹ کُو ٹھہر کے آپے ای آہندے نیں
کاکا ایتھے جو دسیّے اوہنوں دل دماغ تے نقش کرو
ایس عمر وچ ساڈا کم اے دسنا
تہاڈا کم اے سُننا
قسمت نال جے کالج ٹُر گیوں
اوتھے سوال کرن وی ہوندائے
تینوں جواب دیاں گے
اوتھے سوال کریں