بولی عام جَم ٹوئے
خاص دی تک تے رہے،
اِک دِن نِکلی
گھَسَر پَلم کے چڑھ گئی ٹِبّے،
نَپ دَیہلی دربار بہے،
نھا دھو داخل
ہَس رَس گولی حرم سرائیں تھئی کنیز مُڑ مَلک مُعَلّا،
نِت چُست نِت گھیسل غافل،
بھیت رِجھاویں
خُطب وَلاویں
ہار سنگھار تے سَینتر پَینتر
بولی خاص کَن قلم کِتابا دھار ہوئی
گھوٹ علوُم خُمار ہوئی،
تخت دُوالے اُمر وُزر دی نِت تِلکنی نِت آکڑنی
اُٹھک بیٹھک نوں رَنگدی کَجدی
حُکماں فرماناں وچ گَجدی
بولی خاص اخبار تھئی
عام شُمار قطار تھئی،
کُکّڑ پَراں وچ چِچڑّ ناکے
ڈَھن چَھپڑاں وچ پئیاں مَچھّر چھاونیاں،
دفتر مُہر کچہر اسمبلی
نعرہ جَلس جلوسی مُخبر
خاصو عام نِلامی بولی بول گئی،
پَوڈر نُوں نسوار کرے
اُسترا تلوار کرے
وَٹاّ سٹاّ ہُنڈی حوالہ کارڈ کریڈٹ کھول گئی
بولی خاص پنج وقت دوگانہ
ٹِک ٹِک تَسبا
وِچ ٹھانے پٹوار کرے
پنٹ گِٹے سلوار کرے
ننگ ملنگ نُوں چاڑھ اُچھاڑ سفید پوشِیئے
دھرے پلنگ تے کڈھ کروشِیئے
درس قدیمی دیوے جدیدی ٹوئیاں نُوں
نوِیاں مشیناں وِچ پُرانے وعظ بھرے
جیوندیاں دے اَندر جماوے مویاں نوں