الف لیلٰے (اِک ملٹی نیشنل ریسرچ پروجکٹ)
کُکڑ مور تے نہیں جی
پر پُوچھ پراں وِچ ایہدیاں اِک پر مور دا وی ہے
ہُن ساوا ہُن نیلا
ایہہ وی ٹھیک اے آہو
اوس اِک پر نال کُکڑمور تے نہیں ہو جاندا
اوہ تاج کِتھے ایہہ کلگی کتھے
انگریز راج دیاں پُلسیاں والی،
دعوا بانگ دا اجکل کاہدا
گِچی کڈھ منارا کر لئے سنگھی لاؤڈ سپیکر چھی نہیں
کُکڑ وی ایہہ ڈھائی گھڑیاں دائے
اگوں ایہنے چکن پیس یاں چکن کڑاہی ہونائے
رنگ برنگے جوڑ کے پائے لاہ کے-
اوہ اکھ دی دھار چوں تِلکن والا اِک پر مور دا ایس کیہ کرنائے کیوں جی
پَیل دا ول نہیں
پیل دا زور وی کوئی نہیں
زور جے ہے تاں کُکڑی تے جے
جِس ویلے ایہہ کھمب کنیا کے دئے اشارہ بہہ جاندی اے
جھٹ جھٹ اُتے چڑھدائے
گچی نپدائے
پوچھ تے پوچھ دا ٹھپہ لا کے وردی جھاڑدا لہندائے
کُکڑ ہوون دی بے وساہی مُکدی نہیں تے چِکن ہوون دا نمبر آ جاندا اے
ایہنے جادُو رنگا اوہ پر مور دی بادشہی دا کیہ کرنائے
اوہ پر مور دا ککڑی نے وی کیہ کرنائے جی
ککڑی دا وی زور جے ہے تے آنڈیاں تے جے
اِک روز دا
الف لیلٰے دی بی بی والی روز دی اِک کہانی
مور تے سنیائے دنیا داری کردا ای نہیں کہ
پیل جمال دے نال مُرادن ہو جاندی اے مورنی بختاں والی