راندی فقیر دی وکھری کہانی ہوئی،
راہ جاندیاں
ہر سُکھالے جی نال متّھا اوہنے لاونا،
جو کُجھ وی دیوے کوئی
بھنوا کے اوہدے مُونہہ تے مارنا:
'' اِنج گلوں نہیوں لہندے راندی''
''دسّو، ہور کیویں''، اگلا جے آکھے
تے پاسے کر کے اوہنوں سُناونی ایہو جیہی:
'' سُوالی ہوئی او اپنے بھانے نال جیہڑی
گولیاں کُھوال کے نِیندر والیاں،
اوہنوں اُٹھال تے دس
آئی او جنج تیری
اُٹھ نچ تے سانُوں نال نچا''،
آکھ ایہہ نِکل کِتے جانا
پنج ست دینہہ لنگھنے
کِسے ہور شہر وِچ پھیرا راندی پاونا،
پنج ست دینہہ اوہ کتھے لاؤندا ہا
سُنیائے دیہاڑی کر کے ٹُکر کُماوندا ہا