گھاہ مُن گراؤنڈوں باہر کھلوتائے ٹریکٹر
اِلّاں ڈَھلیاں نیں
اِک نہیں فوج اے پوری
گھاہ چوں کیہ پیاں ٹُھنگدیاں نیں ایہہ گوشت خورناں
نال بیٹھا میرے بنچ تے دھوتی پوش آہندائے
‘‘پولو ہوندی جے ایتھے
گھوڑے گُھلدے نیں
کوئی خُون پسینہ ہووے خبرے اوہناں دا
یاں رجیاں کھڈاراں دی تِکہ کبابی مُشک ہووے
یاں گھاہ ای باہروں آیا ہووے خاص کوئی لہو تے پلیا
کیہ لُکیا رہ سکدائے
بھلا نظر عُقابی کولوں’’