''کل سپیادھے بِین والے نال تُسیں کِتھے پئے جاندے سو بھاء''
''یار ای پرانا بُرجُو، ناں دھرسال ای
دِل وِچ آہی چروکی پچُھاں
ایہہ جوگیاں نال کیہ ساک جے سائیں دھرسال تہاڈا
جیہڑا سُنیندے آئے آں،
بِین اوہدی سُن چیتیوں گل لہہ ویندی ہئی،
اج اُٹھ نال میں ہویاں
راہے پئے آں پچُھی اے میں
'کیتی جو اوہناں شپے خاں جی
اوہا کریندے آئے آں،
ایہا ساک ای’
'کیہ کیتی اوہناں؟'
'گورو مچھندر
پوند پیڑھی اے ناتھ لڑی دی،
دُوجا درشن اوہدا بالناتھ دے مگروں
انتلی پیڑھی اے،
ٹِلے ٹریننگ کالج جوگ دا لایا اے
پیرئڈ پریکٹیکل دا آیائے،
آکھیا اے پروفیسر مچھندر
ڈھلو وئی ٹِلیوں
پچُھو لوک نوں سپنی کون ہے
ڈر جیہنوں اندر رُڈھے ڈکی بیٹھے او،
اوہا تے نہیں
بھوئیں گلکڑی وِچ سَرسَر
جیہڑی جُگاں نوں ست کریندی آئی اے؟
ڈنگ تن ایہدے دا
اندر ڈکیا ڈر نہ ہووے تہاڈا؟
ڈھل ٹِلیوں جوگ سٹُوڈنٹ شپّے خاں جی
سڑکے پے گئے
شام ہوئی تے وستی ساہویں
سوچیں لہہ گئے نیں
کھاون کِتھاؤں
سمن کِتھائیں
سانجھ کِچن تے ٹِلّے ہَوسٹل والا اِتھائیں ہویا کوئی نہ،
سپ نپ آل دوالوں
سِر پٹاری وِچ دھر لئے
ٹِلّے پرتن بُھل کے وکھ وکھ ہو گئے
گلی گلی پِھر بین وجیندے
کھول وکھیندے سِر پٹاری
آپو اپنا ڈنگ ٹپیندے گئے'
'مچھندر ناتھ کیہ کیتا'
'کالج ٹھپ دِتا'
'آپ کِتھاں گئے؟'
'ہو گئے جو آہے'
'کیہ؟'
'وا پانی اگ مِٹی'' ‘