شہر ہڑپیّوں باہر وار میں ڈٹھا اِک فقیر
شہر ہڑپّے دونیں اِک نواں تے اِک پُرانا
گئے سمے وِچوں اَج دِیاں رِیتاں لبھدا
میں پُرانے شہروں تُریا آوندا ساں
اوہ سی نویں شہر دے اڈّے وِچ کھلوتا
"اوئے کِدّھر وڑدا جانائیں
بس پیو دی آ؟
پہلوں ٹکٹ کٹا"
اوہ پِچھلے پیریں پرتیا
تے وگ تگ سڑکوں لہہ کے کچّے کچّے ٹُرپیا
"رب دے شیر" دا شیر ڈرائیور
چاء والا پیالہ مُوہدا مار کے
تلی نال مُچھّاں سِدّھیاں کردا
ہٹّی اُتّوں اُٹھیا
بس شہروں نِکل کے وڈی سڑک تے چڑھ گئی
"اوئے مہنگیا مہنگیا اوہ جاندا ای ٹُریا
ایہنوں لے آپھڑ کے مہنگئیے جانے چُک کے دھر سُو اندر"
"ہُن جان دے گُسّہ مرجائیں، چنگا لا جور جیہڑا لاونائیوں
اساں وی نالے لے کے مرنائے تینوں
تیری میری اِک جِنڈڑی کیہے موت وچھوڑے پاونے ہئی شاوا"
"چھڈّو جی تُسیں گڈی ٹورو کیہڑی کھیڈے لگ پئے او
اینویں پینڈا کھوٹا ہوندائے"
"چُپ ای کرجاؤ تُسیں نہیں ایہنوں جاندے
ایہدی لوہے ورگی جِیبھ جے کالی سپنی
ساڈا ایہناں سڑکاں اُتّے ہر ویلے آون جاون ہوندائے
تے اِک واری کُنھجیا ویلا مڑ کے ہتھ نہیں آوندا
ہئی شاوا شے وِچ رکھ ایہنوں مَنکے نوں ہنج"
گڈی ٹُر پئی مہنگا ٹِکٹاں ونڈن لگ پیا
میں اوہدے مُونہہ وَل ویکھیا
ادھکڑ عمر تے کالے کپڑے، لمّے وال تے گل وِچ مالا
اکّھاں لال تے متھے مُڑھکا
میں اوہدے مُونہہ ول ویکھیا
اوہنے اِنج شرما کے اکھ پرتائی
جیویں نِکیاں ہوندیاں
گھر دِیاں کولوں رُس کے روندیاں روندیاں
میں ہانیاں کولوں اَکھ پرتا جاندا ساں