فرید بھنڈار

''میں نیوی وِچ جانائے، بحریہ''

''سمندر تکیائی؟''

''نہیں''

''کوئی کہانی پڑھی ہونی اے''

''نہیں،

بس مینوں مُڈھوں شوق ای ایہو اے''

''کوئی یار کوئی رشتے دار گوانڈھی گیا ہونائے''

''نہیں''

''پھیر کیوں''

''ہور خیال ای نہیں کوئی آوندا''

''پیو تیرا بیمار اے دِل دا

بھرا دی نوکری اجے نہیں لگی

بھیناں اجے ویاہیاں نہیں 

توں پیو نال کم کیوں نہیں کردا''

''اوس کم وِچ کجھ نہیں''

''اوہنے مروڑی لائی جان لڑائی

جوڑ توڑ کے چار مشیناں لائیاں 

ہن آپ بنایا آپ ویچدائے سر تے چاء کے

تہانوں بھین بھراواں نوں سوکھا رکھیائے پڑھایائے''

اجے وی کجھ نہیں؟''

''اوہدے کولوں سپاہی پُلس دا چنگائے''

''دے درخاست پھیر''

''اجے نہیں 

اجے ایف ایس سی نہیں ہوئی مکمل

دو واری دِتائے امتحان، میں گھر وچ پڑھ نہیں سکدا

ہر ویلے دی ٹوکا ٹاکی پڑھدا کیوں نہیں پڑھدا کیوں نہیں''

''پھیر کیویں توں جانائے نیوی''

''ڈرائیور لے لیندے نیں میٹرک نوں اوہ''

''اک واری اندر وڑ جاؤ آپ پڑھاوندے نیں''

''عمر کنی او؟''

“ویہہ اکیہ، اجے ہے ویلا''

''جے نہ اوہناں لیا ڈرائیور؟''

''ہور کوئی تھلے نوکری دین صفائی دی سبھ منظور اے''

''ایہہ تے عشق ہویا''

''جو سمجھو، مینوں وردی چِٹی پسند اے''

''وڈا بھرا کیہ آہندائے''

''فوج دا شوق سی اوہنوں 

آپ تے جا نہیں سکیا

مینوں ہن سمجھاوندائے

'سمندری پانی کھارا کھل گل جاندی آ'

میں کہناں کھل لہہ جاوے میں وردی چِٹی پانی اے''

''آپ سوا کے پا لے''

''آپ سوائی تے وردی نہیں نہ ہوندی

وردی کوئی پواؤندائے''