سِکندر قیصر ہے ایہہ کیسری
شینہہ ہے باندر ہے
رَم راوَن کوئی وَن کے سَر لوہار ہے
جَنڈیاں پَچھ سہیڑے پیا انگیار ہے
کندھ کُہاڑے ڈھالے گال کے سِر گھڑے
شوہ شبیہہ ٹکسال کے سِینے پاکھرے
ناہیں پڑھ پُختے جَنڈی دی وار پڑھی
ایس گج ڈھول نہیں سَمّی نچ وَری
ناہیں نحنُ عَقرب سار کہ نونہہ ہِس نَرخرے
ایہہ ترِکَل چَھج نَلج کوئی کُلّہ دھار ہے
ایہنوں وَڈ وَڈیر دی کَھٹی کُھڈ دی مار ہے
سُوہاں
کیسری: شیر، جَتّل، ہنومان دے پیو دا ناں - (کیس: وال، کیسر:کول یا کِسے پُھل دیاں اندرلیاں تُریاں) ون کے: کندھ کہاڑا سِر گھڑا ون کے سِر لوہار- فریدا ہوں لوڑی گھر آپنا توں لوڑیں انگیار (بابا فرید) پاکھر: زرہ بکتر جنڈی دی وار: جنڈ دا رُکھ دَسدے نیں اگلیاں ویلیاں وِچ شمّی یا سمّی اکھویندا ہا- ایہدیاں ٹہنیاں رگڑ کے اگ جمائی جاندی سی- ایس پاروں ایہدے دوالے چھوہریں اگ لئی دعا دا ناچ نچدیاں آہن جیہڑا ہُن تائیں سمی اکھویندا ہے- اگوں متاں ایہو شمی کہانیاں وِچ شمس رانی بن گئی تے ڈھول نال ایہدے عشق دے قصے ٹرے- گج: ہاتھی، گرج وار:تواریخ (لکھی ہوئی وی تے ورتی ہوئی وی) وری: ویاہی، ڈھونڈی، تانگھی، چُنی سار: خبر، سمجھ، تت، گیان، لوہا نَرخرا:شہ رگ ایہہ ترکل چھج: کلّہ لیندے باورے دیندے کھرے نلج- چوہا کُھڈ نہ ماوئی ترکل بدھے چھج (بابا فرید/بابا نانک)