اساں دیہاڑی دار سارے
کئیاں دِناں دے جُٹے پئے ساں
گھڑ گھڑ پتھر وڈا بَھون اُسارن،
اچن اچیتی کالی چِھٹ اِک پتھروں سری
اِک دے ہتھ تے پے گئی
پُونجھن لگا اوہ پر اِکدم ٹھہر گیا
کُوکیا: بلیؤ ایہہ ممیائی جے
اندر میرا ہور دا ہور پیا ہوندا اے
ہتھ اوہنے سبھناں نال مِلایا
چھڈ تیسی کانڈی سارے
دھمالاں پاون لگے
اساں ایہہ کار ہُن نہیں کمانی
ہور تھئی اے ساڈی کہانی
ٹُھکیا پَٹن دی ویہر اساں
ہتھو ہتھ ورتانی