(۱)
من غلام رسول دئے مائے
میں جانناں
ایہہ سدھ سادھ نہیں كوئی چھوہر تیرا
ہڈ حرام اے اصلوں ویہڑ كا
تفسیر حدیث تے فقہ مكا كے
چنگا بھلا ایہنوں علم كلام تے لایا ہا میں
ركھی مراثن دیاں نہ سنیاں كرتوں ایویں جھل چترائیاں
میں جانناں چپ ایہہ كیہڑی گلوں رہندائے
منڈیاں كڑیاں نال ایہنے بہہ كے
راتیں بیت بنادنے
ٹپے گاونے
میں ہوڑنا – كیوں نہ ہوڑ دا
ہور كوئی ایہنوں وحی تے نازل ہون نہیں لگی
جے چھی مہینے ہوئے نیں مونہوں حرف نہیں كڈھدا
توں زنانی ذات ایں لائی لگ
ركھی مراثن آہندی اے جی ركھی مراثن آہندی اے
لاحول ولا
ایہہ سِدھ سادھ تے پچھلا جَرم تے آواگون
سبھ لغو بات اے
كمی لوك نیں ضعف یقینے
ربك گھروكاوردے نیں
گل علم دی پوہندی نہیں نیں
چپ دی منتا كردے نیں
ایویں ایہنوں ویہلڑنوں اوتار بنابہسن نی كِتلے
نہیں میں عرس تے جانا ای اے نا
نالے ای كھڑساں
آپے مرشد ہوراں كول ای رہسی
بھیڑی بہنی كچ منڈیكا
فیض نصیبے ہویا تاں اوہ وی بھورا لیسی
(۲)
تسیں اج خلیفے بن گئے
خلقت سر رب لگ گئے مہردینیا
اج ہوندی وڈی سركار تہانوں میرا دسدی
كھَلی بانہ میں آكھساں
تساں سبھ سڑدے او میر ےپتر كولوں
اوہ عالم تسیں واہك اُجبك
اوہ مخمل تسیں ریجے
اوہنوں كافر مرتد دسوپئے
اوہنوں گِنو بے ادبا
تہاڈے جہیاں نوں كیہ ساراے
اوہدیاں رمزاں میں جانناں
كھَلی بانہہ میں آكھساں
تساں دھگانے اوہدے ولوں
میلا كیتائے دل میرے نڈھڑے دُولے پیردا
اج ہوندی وڈی سركار تینوں میرا دسدی
تھلیں پہاڑیں میں وڈی سركار دے جوڑے سانبھے
میں پانی نہیں آنداتے سركار نہیں ووضوكیتا
مینوں سینے لاكے آپ الایا صاحب سچے
"تینڈا ہتھ اج مینڈا ہتھ نظام اُلدینا"
تساں ڈھوا گراہیاں فیض دی آڑھت بھالو
تساں ڈردے او
متاں غلام رسول سركاردے نیڑے ہوونجے
تہاڈی كھُرلی وچ پیا گھتے مونہہ موكلا
ہركسے نے لكھیا لیتائے مہر دینیا
اگھ غلام رسولے دا تساں مار نہیں سكدے
اوہنوں كافر مرتد ہوكوپئے
میرے صاحب دانا بردسوپئے
میں نت سركاردے چرنیں لگنائے
اوہ تہانوں نہیں كجھ وی آہندا مہر دینیا
تساں رہو خلیفے
اوہنوں لے چلیاں میں نالے
سركار اجازت دے دِتیونیں
درس پڑھاسی
رَلیا ہوس تاں دانا پانی ٹردارہسی
اوہدے كھیہڑے پے كے كجھ نہ كھٹسو
ہتھوں جگ تے بھنڈی ہوسی تہاڈی ساڈی
(۳)
میرا ناں نظام دین جے
باپ غلام رسولے دا
حاضر ہویاں صاحب دی سركارے
ایتنی عرض گذاراں
بہوں چنگا كیتوئی صاحب جی
جیہڑا چھوہر میرے نوں بندی خانے چاگھتیو جے
میں پیو آں
پیڑاے مینوں
پرمیں نہیں چاہوندا
ایہہ مسیتیں غیر لفظ كوئی بولے
رب دی لاٹھی بے اوازاے
میں نہیں چاہوندا ایہدا ابولیا میرے اگے آوے
دین مبین قلعہ اے ساڈا صاحب جی
تیراں صدیاں تھیں ہے قائم محكم روح دوالے
میں نہیں چاہوندا
میرے پتر كولوں كوئی ایس قلعے نوں سنھ لوائے
میں نہیں چاہوندا ایہدے بول كللے
خلقت نوں پئے پاون كراہے
لوك فسادی كارے كرن اوّلے
ناواں ایہدا الگّے
زِچ ہووے سركارصاحب دی
حاضر ہوئیاں ایتنی عرض گذارن تیرے لاٹ كچہری میرے صاحبا
حالی ایہنوں اندرے ركھو
ایہہ ندا نڑا دل دا صاف اے شودھا
میرا ہكو پتر – نظر مہر دی ہووے
(۴)
مینوں لے لتھا ای مائے غلام رسول دئیے
تیرا كلا پتر
میں تیرے زہد صبون گھسایا
نہیں ایہدیوں اندروں میل لوہے دی دُھپی
لنگھ گئی بوہتی تھوڑی رہ گئی
منكھ دلے نوں چٹسی
ہڈگال لئے
ایہہ كوئی منزل مَلّے
بھانگا نكلے
روشن كردی اے اِك دی كرنی
لیكھ انہیرے كُلھ 1دے
گورے آئے
اوہناں آن كے بھٹھیاں ٹھاریاں
آہرن لمے پائے
اساں ریہلاں ڈاہ سپارے كھولے
جے نہیں پتر بگانے لاہوندے ساڈیاں بیڑیاں زرہ 1بكتراں نہ سہی
اساں رب دے دین تے پہرہ دے كے آپنا آپ سنبھالیے
جھلے نویں انہیری
آپنا ساہ تاھ كڈھیے سوكھا
میرے ترونہہ پیڑھیاں دے جگراتے
ایہدے كمی كداڑے چنی چنی كرچھڈے
دنیا گھر دا چین ڈھونڈیندی وتدی اے
جند ٹھیپہ گھت كھیڈن دا
تینوں حكم حضوری وكھرا اندروں چڑھیا
بِن سركار وسیبا كیہا
گورے دی اے كالے دی اے
توں كیوں رب دا ہتھ بن لتھوں میرے بھادا
نِج جمدیوں پتر مائے غلام رسول دیئے
اساں بہہ نہیں رہنا
سُول قبر وچ تھلسی
دینہہ پر رات میں پیّاں ولائیاں
زرہ:جوڑیاں ہوئیاں(بیڑن-جوڑن)
ہُجھّاں نفس دِیاں سَے رنگیاں
ایہدے كان میں آپنے انگ سہكائے
نہراں آئیاں
لوكاں باغ لوائے
میرا كلّا بُوٹا كلّر دا
جَھمب گئی بُور انہیری "میں" دی
1.کُلھ:جد،پُشت،خاندان
2.زرہ:جوڑیاں ہوئیاں(بیڑن-جوڑن)