کوئی منت مُرادی اک مُٹھ دانہ جاندا سڑکے کیر گیائے
چڑیاں ڈُھک پئیاں نیں
دُور اجے ہاں میں
آپس وچ کر سَینتر اُڈ لُک گئیاں نیں
میں لنگھ دُور ہویاں
ڈھل چُگیونیں دانہ دانہ
ساہمنے رۃکھ تے آ بیٹھی اِک آہندی اے
وہم نہ کر
تیتھوں اساں کیہ ڈرنا
بندیاں دے پیراں وچوں
سانوں جُگاں پُرانی پھاہی والاں دی آونی
اجے سُنیندی اے
ایہہ اُڈ لُک جاون ساڈا
بس ہُن رسم جیہی اے ایویں
جیویں
سُن کے بانگ دوپٹہ سِر تے لَین نہیں کُڑیاں پڑھیاں لکھیاں دا؟
یا بمب کتے سٹ جائے تے اخباراں وِچ وین
سیاسی مگر مچھاں دے