ریل دا پُل جتھے وڈا جُھکدائے
ہیٹھاں کدیں کواٹر سن مزدُوراں دے
مرزے ابراہیم دا تدوں زمانہ ہا
اج اگے دُکاناں نیں
پِچھے ابادی
رکشے ریڑھی والے دیہاڑی دار کاریگر
کرائے تے کمرہ دو کمرے
وِچ وِچ گھر کوئی قبضے وال دا آپنا وی پیا پَیندائے-
اِک پُرانے ورکر سدیا اوہناں نوں
اوہ سَتّے اپڑ گئیاں
کرن ڈرامہ کافی بُلھے شاہی وِچوں جوڑ بنایا
“چوگ کُسنبے دی”
اسیں نال گئے دوئے اپنی پارٹی ولوں،
رولا ہیٹھ دُکاناں دا
اُپر پُل دا رولا
جام ٹریفک اُلّر اُلّر جھاکن لوکیں
جو آوے مُونہہ بولی آون
گھڑی گھڑی اسیں اُٹھ اُٹھ کہیئے سَتّاں نوں
تھاں ٹھیک نہیں چلیئے
آکھن اپنا خیال کرو تھاں ایہو ای اے،
اُتوں واج پئی
“ست گشتیاں”
ہیٹھوں اِک کُوکیا
“اٹھویں بھین تُوں اپنی گھل اوئے”
اوہنوں پُرانے ورکر ڈکیا
میرا مُونہہ سُک گیا
ساتھی آہندائے “ہُن خیر نہیں، واجا وج گیائی
بوتل کوک دی آئی کہ آئی سمجھو اُپروں
وج گئی جیہنوں اوہ گئی”
ایہو گل میں سَتّاں چوں اِک نوں جا سمجھاوناں
ہس کے آہندی اے “آوے
کیچ کریں تے پی جائیں،
مُونہہ تیرا خُشک جو ہویا پیائے”
بانگ مِلی
اوہ رُکیاں
اِک داڑھی ٹوپی والا اُٹھیائے “بولو بی بی، ایہو نماز فقیری جے”
مُکیا ڈرامہ
جُتیاں پا دوپٹے لے اوہ پُل ول ٹُر پئیاں
پنج ست بال دھمال پاوندے لنگھ گئے کولوں
“ہاری، ہاری نی میں کسُمبڑا چُن چُن ہاری”
اساں دوہاں مبارک دِتی سَتّاں نوں
ہس کے آہندیاں نیں “مبارک تہانوں ہووے کہ”
میں شرمندہ جیہا آکھناں “کیہ دسیئے، کُجھ کر سکے ای نہیں”
آکھن ہسدیاں “لے کیوں؟
تُساں ساڈے حصے دا ڈر نہیں ڈریا؟”