ناں كیہ لئی دائے رُوڑیا
تیرے گھر وی ہوگیائے منڈا
ودھیں جاؤ پیداوار ہوا دی
میرا كجھ نہیں كھسنا
آویں جاؤ ڈاراں بنھ كے رتیاں چنجاں والیو
میں نہیں مكنا
مُك گئے شِكرے جیوندیاں شیئیں كھاونے مرنے
تتے لہو دے تڑكے ساڑے
میرا ہڈ گوشت سبھ ٹھنڈا
موئے سلے سیت انگ مینوں نت جُفتی دا جھوٹا
تسیں ہرئیل
تہاڈے سوہے گانے
رَت دیاں كنیاں
چھِٹ اُڈاری بھرم گھڑی دا
كرو وٹھ وٹھ دھرتی رُوڑی
جیون ، جھولا، بھكھ دا رُگ
اتے موت امر رج نت دا
تساں تركھے نت پئے چھڑسو
میں ٹھنڈڑا
نت ہنڈساں
دھنہ مہر مینوں آكھن لگا
منشی گل نہیں كائی
میں آكھیا جی سركار جی گل نہیں كائی
اَكھے منشی گل تاں تاہیوں ای
جے محل پوائیے اوہ جیہدی جگ تے دوج نہ ہووے
میں آكھیا جی سركار جی
ہووے اپروں ہیٹھاں ول اساری
نیہنہ اسماناں اندر ہووے
كِھتیاں اندر كرسی
دھنہ مہر تے اُٹھ كے بہہ گیا
اپروں ہیٹھا ںول اُساری!
منشی جھبدے كرو تیاری
میں سائیں راج سدایا
وئی محل پوانائے
اُپروں ہیٹھاں ول اُساری
اوئے مونہہ میرا كوئی شیشہ اے تیرا
چالیہاں دیہاں دی ویہل ای تینوں
جوسر بندھ وی كرنا ای كرگھن
اُپروں اُسرمحل سلكھنا
اڈول زویں وَل آوے
نہیں تاں بچے تینڈے بھوبھر اكے ٹنگساں باہر حویلی دے
سائیں گیا
دیہنہ چالیہئیں آن بوہا كھڑكایوس
نہ تیسی نہ سالھ نہ كانڈی
لے منشی اساں آگئے اُوں
گتھلا چھنڈ یوس
توتے اُڈ چڑھے اسمانیں
وت گھمر گھت حویلی اپركوكےآنواٹاں گھلوگارا
آنواٹاں گھلوگارا
سائیں راج مڑپھدیا آیا
آكھے مہر جی كاریگر تدھ آپ سدائے
عمراں دیاں دیہاڑیاں ایہناں دھروں نبھائیاں پلے
سكھراں تے ہن لگیاں گواں
چھوہیا كم ادھ اٹے چھڈ كے آون كیكن تھلے
سائیں گیا تے مڑنہ آیا
رتیاں چنجاں والے گھتن سدا ہوائیں گھیرے
آنواٹاں گھلوگارا
آنواٹاں گھلوگارا
دھنہ مہرپیامچھا كھوہے
نوریا محل كتھا ای مینڈا
میں ہور سدائے خُمرے فارسی
بیٹھ بنیرے كرن قوالی
محل مبارك مرحبا
گنبد فلك نماشاہا
پرتوتے سُوں سُوں ڈار ہزاراں
آنو اِٹاں گھلّو گارا
آنو اِٹاں گھلّو گارا
خمرے فارسی اك دو واریاں لاكے ویل اڈیكن لگ پئے
دھنے مہر دے روندرفل دے مكے
مكیاں گاہلیں
لمكے رتے ڈیلے
چھیكڑشكرے چھڈے راكھویں
شكر چڑھن جہازاں وانگر
پرساوے كھمب تے سوہیاں چنجاں پھل پتراں وچ چھائیں مائیں
ہف ہف شكرے ڈھلن راكھویں
اُپروں ورھ پئے رولا
آنو اِٹّاں گھلّو گارا
آنو اِٹّاں گھلّو گارا
دھنے مہردے جھگ وراچھیں
ہنبھےشكرے كُٹ كُٹ مارے
شكرے ٹھنڈے تاڑ كے اپروں لتھیاں گرجاں
سہج نال اوہناں بہہ بنیریاں اُتے
لائی كچہری
كندھیں وگے پرچھاویں
دھنے مہر دے اكھ اسمانیں
مونہہ سروٹھاں
اوڑك كٹھے سنڈھے ہاروگایوس پھوكا
مینوں محل ہوائی نہیں چاہیدے
جیہڑے رقبے چھڈ گیائے دھنہ اوہو پواڑا گھٹ اے
كوٹھیاں شہر وشہر پوانیا ں پیاں
بساں روٹو روٹ چلانیاں پیاں
بنكاں كمپنیاں وچ ملنے پے گئے حصے
تسیں جمی آؤڈاراں
ناں كیہ لئی دائے روڑیا
ارب كروڑاں تھی جاؤ
كوكی آؤاِٹّا گارا
كھمباں نال ہلاؤ دھرتی
چنجاں نال اسمان كھدیڑو
تہاتھوں وال نہ كھتھا میرا
دفتردفتر دسخط میرے جیہڑا كاغذ چلے
ہربندے دا ادھ مردار اے
كجھ اپروں كجھ ہیٹھوں دھڑ سبھ میرے انگوٹھے تھلے