بولی خاصاں دی
(ناں کوئی وی ہووے)
عاماں دی کرنی جرنی ولا کے لنگھن ہی اوہدی بنتر ہے
ناں ناواں اوہ ایس ولا لنگھن دا کھٹدی اے ،
بولی عاماں دی
(ناں اوہدے بھاویں اوتنے ای ہوون جتنے عام عوام نیں)
اکھر اپنے مُدتاں دی کار کمائی جوڑے
خاص ولا لنگھ جاون تاں کُوڑا کر کے رُڑی تے سَٹدی اے،
بولی خاصاں دی وچ خاص ہے بے دھیانی
مطلب کڈھن دی
جیہدے چوں کڈھیا اوہ عاماں لئی چھڈن دی،
حرف عاماں دی بولی دے
چھڈیا مطلب خاصا پا کے
اپنا آپ ونجا ہور ہو جاندے نیں،
خاص بولی دی بے دھیانی جانی اے ان جانی؟
ایہہ پتہ کدے نہیں لگدا۔
رمزاں خصوصے لکھیاراں دیاں
کِسے اصلی ورتی نوں نہیں چھوہندیاں
بناؤٹی ورتی دی
وردی ویتر تن من نوں پہناوندیاں لگیاں آئیاں نیں،
خاص کون نیں
کیویں خاص تھئے نیں
عام کون نیں کیویں عام رہے نیں
عام خاص دی ونڈ کیویں تھئی
کیوں تھئی
خاص بولیاں
ویروے کرکر ڈھیر ایس گل دے لاوندیاں لگیاں آئیاں نیں
عام بولی کنوں (ناں اوہدا کوئی ہووے نہ ہووے)
ڈر ہے اِکوّ
ایہو خاص گل متے عاماں کنوں کروا ای نہ دیوے کدھرے