ہاڑ ہسٹری شام داویلا
مال روڈ تے ٹانویں ٹانویں بندے نیں
پٹڑی اُتے دھرے سبیلی گھڑیاں اندر پانی كوئی نہیں
ہٹیاں اُتے بوتلاں بلھیاں ہوئیاں نیں
بس تے اج كوئی آونی نہیں
كوئی ركشہ ٹیكسی لبھ جائے ایتھوں نكلیے
ہرآوندے ركشے ٹیكسی نوں میں ہتھ دین دی كرناں
میرے نال كھلوتا
ہار موتیے والا بال میرے اگے اگے الركے
ہرآوندے ركشے ٹیكسی كارنوں ہار وكھاون دی كردائے
میں ذرا پریرے ہوكے ركشے روكن لگ پیناں
تے اوہ مڑے میرے نال آن كے ہاروكھاون لگ پیندائے
اك كار اوہنوں كھیہہ كے لنگھدی اے
جیویں انھے بھونڈتوں جِنا آپنا آپ بچائیے وچ آوجدائے
میں اوس كار توں بچ كے
پیرپچھا نہہ نوں كرناں
اوہ مینوں ہٹدے ہٹدے نوں وی موڈھامار كے لنگھ جاندی اے
انھا بھونڈ - میرے مونہوں نكلیائے
اوئے تیری بھین نوں – بال بولیائے
كار چیكدی پچھلے پیریں پرتی اے
ہار موتیے والا بال میرے مگر ہوگیائے
میں سوچناں
میں آكھساں – انھیا بھونڈا
ہاڑ تیرا نہیں بہتا ہنڈنا
رُت پھری تے مك جانائے ایہہ لوراتیرا
توں چُراں وچ كھسی ڈنگ لكاوندیاں پھرنائے
اك نواں جوانی چڑھیا منڈا كارچوں لہندائے
ہارموتیے والے بال ول الردائے
"كیوں اوئے كیا تكلیف ہے تمكو – ہیں"
پھیر اوہنوں وچے چھڈ كے مینوں الرپیندائے
"كیوں اوئے كیا تكلیف ہے آپ كو – ہیں- "
ایہہ موئی مچھی وانگوں ایہدی اكھ تے جھلی كیہی اے
میں پچھے ہٹڈا ہٹدا آكھناں – ”میں نے كچھ نہیں كہا آپكو“
(ہن ہار موتیے والا بال میرے پچھے كوئی نہیں)
اوہدے نھاتے دھوتے پلے پلائے مونہہ تے
بہی جیہی مسكان اك اُگھڑ آوندی اے
واء دی لہر نال جیویں كھلوتے پانی اتوں
پل دے پل لئی اُلی چِرجائے
اوہ كارچ بہہ كے
ٹانویاں ٹانویاں ہاڑ ہسٹریاں آپنا آپ بچاوندیاں اندر وجدا
لنگھ جاندا ائے