شامی ناؤں ہا، آہندا ہوندا ہا
آئے ایران مُڑ ہندوستان وڈیرے میرے
شاہ فیروز تُغلق دے ویلے،
پڑھن امریکہ گیا
ڈِگریاں ڈھیر سہیڑ لیایا
سَیم سَیم اکھواندا ہا اوتھے
سَیمسن وی ناں پیا
(بَوڈی بِلڈنگ وی کیتی ہئی
ڈنڈ بیٹھک دا ٹھرک وی ہا)
اوہناں دِناں وِچ سیمسن اینڈ ڈی لائیلا فلم دا
بہوں چرچا ہا،
آیا ایتھے پڑھاون لگ پیا
سَیمی سامی آکھن ساتھی
سام دا لَیپالک بھتریجا،
آیا ویلا ضیاالحق دا
ڈِسٹنگُوِشڈ پروفیسر ہو گیا
گھنی ریسرچ گُھکائی
عِلم ہُنر سبھ ہوئے حجازی
کیہ سائنساں کیہ فلس فلُوسے
کیہ سُر ساز مصوریاں
لک بنھ سبھ ہوئے غازی،
شہرو شہر مُڑ لیکچر ہوئے
لمے لمے مضمون چھپے
آپھر گئے اخباراں رسالے
ہنیر سویرے پھیرے ہیرے مُلکو مُلکی پئے،
روشی خاص الخاص شاگرد سی
ہتھیں پال سنبھال سواری
اوس دِن اوہنوں پتہ نہیں کیہ ہویا
شامی صاحب نوں
سُندی سُندی
بھری محفل وِچ ہسن لگ پئی
ہسی آوے
''جِیا جُون دی جم جات دی وار تُساں کیوں ڈکی کھلوتے او سَر شامی
کِتھے بنھ کے دھریا جے افریقہ
نقش نِرت سُر سار سَرے جِتھ بندے نوں،
پتے پھینٹ ورتاؤ مُڑ کے شامی صاحب
منیا سامی ہُن تُسیں کوئی ہَولی نہیں
دُکیاں اُتے یکّے دھر دھر سراں بنائی آئے او''
پہلاں تے کُجھ بھیڑے جیہے پئے مُڑ مُسکائے سَر شامی
پھیر کُھل کے ہسن لگ پئے ٹھٹھے مار مار کے
''لؤ جی اج توں بعد سبھ سَراں ایہدیاں رَوشی دیاں''
مگروں اِکدو جاندے ساتھی اوہناں دے آپس وِچ گل کرن پئے
''چنگی تے نہیں ہوئی ایہہ سَیمی سامی نال اج یار''
''آپ کرائی نہ ہووے متے، آہو کیہ اتبار''
''کیوں، کُجھ ہوون والائے''
''خبرے''
اگلے ہفتے ہوائی جہاز اِک اُپر ہوا وِچ پاٹ گیا