ویکھو میاں جی
آپاں تے ہوئے پرچھاویں
بِرچھ تے مُدتاں ہوئیاں گئے نوں
جانا کِتھے ہا وڈھ بالیا اوہناں میاں جی،
او جی اوہا
آ بیٹھے ہَن جیہڑے زِویں تے لہہ اسمانوں
مَیل کناں دی گالن ساڈی
پور سنیہڑے عرش محشری بلدے،
لؤ، بَھلے عالم ہوئے تُساں وی، دسّو
نال کیہدے پرچھاواں جاندا اے
رُکھ جِتنے ہوئے نیں مُڈھوں
سبھناں دے ایتھے ای نیں
دِسدے کوئی نہیں،
چھڈو میاں جی جان دیو
دِس پوندے جے آپاں تہانوں
اُگ نہ زِویں چوں آوندے تُساں؟
سٹ ڈھال دستاری
سنگ پرچھاویں
انت دھمال نہ پاوندے؟