رُکھ رقم خرچ کے لائیدائے
پیوند کرائیدائے
دن پر رات کرِیدی اے راکھی
ساری عمر ہنڈھائی کمائیدائے
رُکھ خبرے کوئی فقر دا بال اے
بھیت نہیں دیندا
وچو وچ پیا آپنی کرنی کردائے
ماندری بن کے واء نوں آہندائے
وِس پیون دے آپنی
موئے انگ جواواں
بن سنیاسی
بندیاں پَکُھواں پشواں اندروں نِکلی ساڑ ہواڑ نوں آہندائے
تینوں سورج اندر مار کے کھاد بناواں
عجب کوئی رُکھ بے پرواہ اے
ہر دم حاضر مہربان
نہیں پاک پلیتی پُندا
مومن کافر گِندا نہیں
بن سانسی ساڈا پیا حرام حلالے
بن چوہڑا ساڈے اندر سوتے
کُوڑے تے اگ پالے
ات راضی
ات بے زبان
رُکھ نہیں کوئی کامائے آکی۱
جیہدا اگا پچھا کوئی نہیں
ناؤں نشانوں باہرا
دَم دعوے نال چُپ چپاتا
موت دی سلطانی اُتھلّن رَلیائے
۱- آکی: نابر