''دھن کیہ اے- ماواں دا دُدّھ- اوہناں دیاں دِھیاں پُتراں دی کمائی''- ایہہ گل تے آئی اے کھیال ''الفو پیرنی دی وار''وِچ- پر جاپدا اے ایہدا پُورا ویروا وی کِتے کر ای آئے آں - پر کِتھے، ایہہ چیتے نہیں - خبرے سنگت وِچ گل تھئی اے کِسے ویلے پر لِکھی نہیں گئی- آؤ ہُن لِکھ نوِیں کرئیے-
جِت دیہاڑے دھن وری، ساہے لئے لِکھا
مَلک جو کنِیں سُنی دا، مُونہہ وِکھالے آ
دھن ایتھے تِیویں اے، جنی، جو دُدھ دیندی اے، مُڈھلا جِیوکا نویں جائی ہوند دا- ایہدی لوڑ نویں جائی ہوند دے اندر اے سو اوہ آپ ای ماؤ کنوں گِھندی اے ممّے نُوں مُونہہ لا کے- تے ایسے جِیوکے تے پل وڈیری تِھیندی اے-
ارتھالیاں دھن لفظ دے ارتھ جنی تے دسیندیاں نیں پر ایہہ لفظ آیا کِتھوں، ایہدی دس نہیں پاوندیاں - لفظ دی بنتر جاچو- دُدھ دی ''دُ''تے ''دھ'' وِچوں ای اُسریا جاپدا اے دھن- ایہدے وِچ ای دوہن تے دُہِیجن اے- سو دھن آپ ای دُدھ ہے-
ایہہ دھن، ایہہ جیون سوتا جِس سریر اندر ہے اوہ وی دھن اکھوایا، سو جنی دھن تھئی- جیہڑے ویلے دھن (جنی) ورِیج گئی کِسے نر نال، اوس ویلے اوہدی مِلکھ تھی گئی، اوہدی جائیداد، دولت- ایہہ گل تدوں تھئی جدوں منس جُون کرنہار تے سانبھن ہار میلاں وِچ ونڈیجی- دُھروں نر نار دا سانگا سہج دا ہا، برابری دا سواہرا، قُدرت دا دِتا- لفظ ورتن دے وٹاء پاروں اپنے ارتھ وی وٹیندے نیں - پر ورتن دی وار دے اندر ای اوہناں دا مُڈھ وی لُکیا ہوندا اے- (ورتن= معیشت، اِکانومی- وار= تاریخ، ہِسٹری)
فریدی دوہڑے وِچ ایس وار دی سار ہے- جدن دھن (جنی) مِلکھ تھی گئی نر دی تے اوہدا دُدھ (دھن) وی نر دی مِلکھ بن گیا- اوہنوں پی کے جِیون والی وی پیو دی مالکی ہو گئی- جو عورت نال ہوئی اوہا دُدھ دیون والیاں گائِیں مجِھیں نال ہوئی- اوہ وی نر مالک دا مال بن گئیاں - بھوئیں وی واہی ہیٹھ آ کے مالکی بنی پر پہلوں بھوئیں دی اُگاس تے جِیون والِیاں مالک دا دھن بنیاں -
فریدی دوہڑا دسیندا اے جو جنی دا ملکھ ہوون، اوہدے تت ست دا اوہدے وسوں باہر ہو ونجن اوہدی موت ہے- پر نال ای دوہڑا جنی نُوں اوہدے نال ورتی دی سار کرا کے اوہنوں اوہدے اندروں جمی ایس ورتی دی ناہی دا وی ساودان کریندا اے- توں مِلکھ ای نہیں، مِلکھ نُوں پٹن دا تران وی ایں: کال- مال نُوں، مال دی کیتی نُوں فنا کرنہار- تے تیرے اندر ای ستیا ہے-مل مِلکھ توں ازاد سانجھ ویہار وساون دی-