تھدا کتاباں دا
اِک وِچوں کِھسکی سڑکے ڈِگ پئی
کچی جِلد آہی کُھل گئی
ورقے کِھلر گئے
بال سکولوں پُھٹے
ٹائراں نال پلم کُجھ اگلے شہر گئے
دو اسیں وِچوں چھال مار کے لہہ گئے ٹوئے
کتیں دی رُت راتیں چڑھی ہنیری
اُڈ میرے نالدا نالے تَریا
بازِیاں ماردا پِنڈ میں جا دھرسالے اڑیا
جھاتاں اندر
مائی آئی جھاڑُو پھیردی
چا مینوں پڑھیا
چھاتی اندر لیوس لکو
پوترا آیا سکولوں
مائی مینوں اوہدے ہتھ پھڑایا
”کیہ کراں ایہنوں“، نظر مار اوہ آہندائے
”پڑھ کے سُنا“
”دفع کر
ایہہ کیہڑے امتحان وِچ آونائے“
”چل بستہ دھر ہتھ دھو
تُوں ٹُکر کھا
پھیر کدے سہی“
اوہدے ہتھوں لے مینوں مائی روٹی اوہدی سیکن لگ پئی