تُساں کُونج تے ڈِٹھی گھٹ ای ہوسی
اوہ وی خبرے چِڑیا گھر ای
ہاں ناں تے سُندے آئے او نِکیاں ہوندیاں دے،
اساں تے پلیاں محل حویلی
چال ڈھال وی بیگماتی بولی وی،
آنڈے وڈیرے دے دے صاحباں راج نواباں نُوں
کُکڑی پروکھے کیتی،
پانی دیاں اَس جائیاں
کُونج بھین وی پانی دی اے،
آئی جِتھاؤں اُتھاں پانی جم وَیندا اے،
سو کھنب کھلار اُڈار ہوئی ایہہ انبراں تے
کھاون ہنڈاون وی رکھیا جہانوں باہرا ای،
ہنساں نال ای وائیں سنجوگ بھوگیندی اے،
ساہ لیندے پَتر نُوں وی نہیں چھوہندی،
کِھنگر چَھکن انند ہے اوہنوں
کھٹ چُسک کے چُنجوں ہنس دی
دُدھ دا دُدھ تے پانی دا پانی کریندی اے،
کھنب تے اساڈے وی نیں
پر اُڈ اساں کیہ لینا
ٹہل ٹَوہر سوادی اے سانوں،
جِتھے کِتے کوئی ہے تلاء سرکاری
بھرو کرایہ بیڑی دا تے آؤ ساڈے نال تر ویکھو
-1 بتکار= بتکاں (بطخاں) دی بولی-