تُدھ پچُھیا ہا اصلا مینڈا
سچی دساں
کچ نہ پک ہے
رِزم خاک ہے مُول اساڈا
ہے کیہ رِزم
ایہہ بھیت نہیں کوئی
اپنا اندر باہر جو ہویا،
کچ پک دا پندھ بُھلاوا
بھٹھہ آوا تت بُھلاوا
تاء آوی دا دم دیندا ہا، سہجے سخت کریندا ہا
تاء بھٹھیاں دا گھنا اُتاولا
گھڑی چ روڑ کے کڈھ دیندا اے،
وڈیاں ساڈیاں
سہجے پک پک محل حویلیاں پایاں
اساں تُرت لال ہو کوٹِھیاں دفتر
دفتر کوٹِھیاں اُپر ہیٹھ پلازے ملاحظے چاڑھے،
جدن کدن وی بُھل بھلیکھے
آیا چیتے رِزم خاک دا ساک
سہی ہویا
کچ ہو سچ کِھنڈ جاون دا ویلا آیا اے