نکمی گل کوئی
اینویں سِر وچ پھس بہندی اے
اگے نہیں سی
خورے بڈھیپائے
کل دی سُن لؤ
ساہمنے دفتر دا کم کردا جے بھاپا
چپڑاسی چوکیدار اے خورے‘ ہور کیہ ہونائے
روز میرے نال گھر تائیں جاندائے سودا سُودا پھڑ کے
کل وی ٹریائے‘ تُسِیں سنو نا
رہندا کتھے میں نہیں پچھیا نہ اوہنے دسیائے
ہٹی آ بہندا اے چھٹی کر کے
ویہہ ورھے کہ خورے تریہہ ہوئے سو
منڈے اگانہہ پچھانہہ جے ہوئے تے گاہک نوں چاء پھڑا دتی
بھانڈے مانجے
میں بول بہن جے اٹھیاں پیسے سانبھے
دین لین کیہ ہونائے‘ تُسِیں سنو نا‘ چاء پیالی پیندائے
’منڈیاں نال ایہدی مڈھوں چوھل رہی اے- جِنے رہے نیں
لوکیں ٹَھرکی آہندے نیں تے راضی ہوندائے
ہونائے خورے- تُسِیں سنو نا
منڈے کیہڑے فرشتے نیں
ایہنوں ہر ویلے جپھہ چونڈھی دھپھہ کر کے ای وتر رہندے نیں
جیویں بال کھڈاوِیاں نال نہیں کردے؟
چنگائے
اُنج ٹکدے کتھے جے ڈھیکے سوہرے
چھڈو گل سنو نہ کل دی
میں ناں وی کدے نہیں پچھیا
ہر کسے نوں بھاپا آہندائے ہر کوئی ایہنوں بھاپا آہندائے
سنو نہ کل دی
سبزی چک میرے نال ٹریائے
اینویں سوہری اڑ بہندی اے کسے ویلے کوئی
اگے نہیں سی ہن ای ہویائے
انج لوڑ ویلے تے ناں وی بھل جاندے نیں سنو نا
آہر نال آپنے ٹریائے
تِھڑکیائے اکدم سنبھل کے ہسیائے
اکھے ''جان دیو سرکار مافی کر چھوڑوس''
مکھے ''کیہ گل ہوئی اے بھاپا''
اکھے ''بھاپے اوہ تک نا تار تے سرکار کالے برخے آلی''
مکھے ''کاں دی آہنائیں؟''
اکھے ''آہو بُھل ہوئی اے کل دی ڈاڈھی''
''کیہ''- اکھے ''ساب دا اندر مار کے نکلیاں
بوڑھ تھلے میں تکیائے ڈھٹھا
اپر شور ککارا آیو نپڑیو
اگے جاندیاں آئی اے دل وچ ویکھاں ساہ متے کوئی ہوویس
لنگھ گیاں:
جناور مردے ای نیں
چاء نپڑیندیاں ہک دو وار مڑ آئی اے دل وچ‘ جاواں
پر آکھاں جان جاپدی کوئی نہ آہی
وچلی گل کوئی آہی ہور نا:
مڑ کے جاواں چاواں چُنج وچ پانی پاواں
باؤ آکھن ’کملا ہو گیائے‘
نالدے آکھن ’توں درویش ایں‘
نہیں پرتیا بھاپے
توں گھر وڑیائیں میں ٹیشن ٹریاں
باگ چوں لنگھناں اکدم اپروں آیو نپڑیو
اواگھت ہک آیائے سر نوں ٹھونگ گیائے
اگیرے ہویاں دوجا پھیر تریجا
مساں نس کے باگ میں ٹپیائی
مکھے ''دفتر کتے تے باگ کتے اینویں چانس ہو گیائے بھاپا''
اکھے ''نہیں ایہناں دی وَیر لیس ای
ہکدوئے دی خبر نیں پوری دکھن پربت ہووے
واء سانجھی نیں سدھی
ساڈیاں سڑکاں نہیں نا کچھدے''
مکھے ''چھڈ وی بھاپا ہور بتھیرے افسر باؤ لنگھے ہوسن
دھیان وی نہیں کسے کیتا ہونا
تیرے ای کھتے پینا سن نیں''
اکھے ''پُچھ وی اوہدی ہوندی آ جیہڑا وچ ہوندیاں نہ ہووے''-
اینویں رڑکدی اے پئی کل دی
خورے بڈھیپا اے
تہاڈے نال کردیاں ویہل ہوئی جے بھورا
پیالی ہور پیو
چِھڑ پینی اے چام چڑک جھٹ مگروں