انار كلی وچ كار تے ہولی ہولی جاندیاں
اٹھاں دساں ورھیاں دا اك بال دوالے ہوگیا میرے
بارھیں روپئیں چھی نیں باجی
میں سوچیا شیشے اندر بلبلے نیں
آئے گئے دے اگے دھر نہیں سكدے
اَڈیاں اڈیاں لال سوہیاں اكھاں وال اوہدے كھڑے كھڑے
كیہہ دینا جے باجی
تیرے شیشے اندر بلبلے نیں كاكا
میرے كم نہیں آونے
باری تھانیں اوہ گلاس میرے جھولی اندر دھرے دھرے
چلو رپیہ گھٹ دے دیو
یارھیں روپئیں چھی جے ہن تے لے جاؤ باجی
جے میں ایہنوں پچھیا توں كیوں پڑھدا نہیں
ماں بماراے پیو چھڈ گیائے – نكے نكے بھین بھرانیں
اہو كہانی كرسی ایہہ وی
جیہڑی سارے كردے نیں
كاكا ایڈی قہر دی دھپ اے چھاویں ہوجا
چلو رپیہ گھٹ دے دیو
دسیں روپئیں چھی كتوں نہیں لبھنے باجی
میں سوچیا – دس روپئے میں ایویں سٹاں
بلبلیاں والے شیشے توں میرا جی ہمیشاں كچا كچا ہوندا اے
سَیناں درزن انج تاں سستی رہندی اے
مال روڈ دے كم دا بھلیكھا پیندا اے
سیناں دے گھر جاندیاں اكوڈر مینوں لگارہندا اے
اوہ بلبلیاں والے گلاس اچیچا كڈھ كے شربت دیندی اے
نہیں گلاس نہیں چاہیدے كاكا
اوہ كاردی باری چھدے كے لانبھے ہوگیا
گُڈی بوكر اكے جیویں ڈورولھیٹن لگ پیا ہووے
اڈیاں اڈیاں لال سوہیاں اكھا ںوال اوہدے كھڑے كھڑے
تھوڑی دور میں جاكے سوچیا
دس روپئے تے ایویں ای خرچے جانے نیں
پھیر سوچیا اٹھ دس آنے انجے ای ایہنوں دے دئیے
اینا چرا ایہہ دھپے كلپیائے
كاربیك میں كركے اوہدے كول كھلاری
بنی صلاح پھیر باجی
نہیں میں پچھیا سی
توں میری گلاساں بارے گل دا برا منایا نہیں نہ
انج لگا جیویں میرے ایہہ گل كردیاں نوں
اوہ بھریا بھریا جنابن گیائے
لال سوہیاں اكھاں اندر كجھ نرمی كجھ بے پرواہی
ڈونگھی جیہی اوازنال آكھن لگا
غم نہ كریا كرو