''آ نُورِئیے فتُورِئیے،
لؤ،
تُسیں وی نال او شَونکی بُرجُو؟
کیہڑے پِنڈوں پھیر لیائی ایں ایہناں نُوں
تے ہیر لیائی ایں ایہہ کستوری وی اوتھوں''
''بھا چکھو تاں سہی نا جیہڑا پرونٹھا آندا سُو
سرگھی دے توَے توں لاہ کے
ایویں ای کستُوری ایہنوں
کر پاسے پئے دھردے او،''
''بھاء شپیا میں آں لِسّی مِسّی''
''بلّے،
جے تُوں لِسّی ایں تاں نُوری تے پھیر تندُوری ہوئی نا''
''ناں میرا ایہہ ماسی سرگھی رکھیا اے بھاء
ہُن تے ویلا کڈھ کے ای مِلنی آں،
بیبے میری نال ہر ویلے دا اُٹھن بہن ہا اوہناں دا،
دھی بنایا ہویا ہا بیبے اوہناں نُوں،
ہُن میں دھی آں ماسی سرگھی دی،
اج میں ماسی کول بات پئی پاونی آں بُھکھ دی
ایہہ تریوے آ گئے نیں سنگی میرے
سُنی اے ایہناں وی،
ماسی آکھیا جا ہُن ایہناں نال
میرے شپڑُو کول
سُنا اوہنوں''
''لؤ، بُھکھ تے پِچھلے اندر اے ایس تھڑے میرے دے
تُوں کِتھوں سُن لئی اوہدی کہانی
لِسیئے مِسیئے ساڈی سرگھی دِئیے،
پر کوئی پتہ نہیں
کِس ویلے ایتھوں نِکل ایہہ بُھکھ اوتھے بہہ گئی ہووے''
''سُنو نا بھاء تُسیں لِسّی مِسّی کولوں،
ایہہ تے دسدی اے گل ای ہور ہوئی پئی اے''
آہو سُننے آں یار، متے میرا اندر ایہہ پِچھلا وی ہور ہو جاوے''
''سُنو جی بُھکھ دی اوہدی زبانی
جیویں سُنائی سُو
وِچ وِچ اَلاء کے
وِچ نچ گا کے:
’میں روز دے دورے تے آں گھر گھر،
پھڑی خانچے فوج دی فوج اوہ آئے نیں،
آکھیئم دس دس جبھ سُکائی اے
میں رج نہیں جے ہونا
کیوں میں اپنا آپ گواواں
لوتھ کتاباں وِچ لمکاواں،
جو لیائے او میرا پکایا اے
جاؤ دعوت کرو ست پُشتاں دی،
سادھو سنت تے پیر پیغمبر لتھے ہزاراں
جُون وٹاون میری،
ساہ لؤ مَکھے،
چِھٹ میں تُھک دی وائیں وگائی
اِٹ چرچے دی ہو ہتھ اوہناں دے آئی،
انگل انگل تھئی دُکڑ مستاں وست اَلَستاں دی
لگّا اِٹّ کھڑکّا،
کِسے پاسیوں آئی اے ہیک اچیتی
بُھکھے نانہہ1
نہیں ہم رجّے،
ننگے نانہہ
نہیں ہم کجّے،
روندے نانہہ
نہیں ہم ہسدے
اُجڑے نانہہ
نہیں ہم وسدے
پاپی نانہہ
سُدھرمی نانہہ
پُن پاپ کے راہ نہ یاں
جُھرڑی جیہی مینوں آئی میں سم گئی آں
اُٹھی تے کیہ ویہنی آں
ہیک جتھاؤں باہوڑی میں تے اوتھے آں،
سار تھئی اے مینوں میں کون ہاں
بنی آں کیویں،
سہی تھیا مینوں
جوہاں اوہدا تروڑ وی میرے اندرے ای اے،
سَریا لُوں لُوں عجب سواد
تُرت میں اپنی چور ہوئی
سو ہور ہوئی'' ‘
''عجب پرونٹھ کھوایا ای لِسّا مِسّا،
ویکھو
لگدائے پِچھلا اندر وی ایس تھڑے دا
سکھنا تھی گیا اے،
کھول نہ بہیئے؟
کیہ اساں ہُن ڈھکنا اے
1 -کافی بُلھے شاہ-