دسّو
اوہ اکھر اساں کِس کاری
بِھیڑ وڑے نہیں چِکڑ گَلے نہیں
گھاڑ گھڑے نہیں ڈھال ڈَھلے نہیں
کَر پیراں نہیں تارے پار اُتارے
ڈاہ کُرسیاں نوٹ بھرن سرکاری
لا کچہری کھنگھ کھنگُھورے گجّ بیان ہوائیں
فجر سوال1 جگاون پیشی بانگی عرش منارے،
اوہ اکھر اسانوں وارے
اِٹّ کھڑکّے دُکڑ وجّے تتّا کرن جو چُلّھا
سُرت سُوئی ہو پریم دے دھاگے بانا ننگ بناون
رَوی داس ہتھ آر تے رَمبی
تنن کبیری تانے
رَل گیا موریوں کڈھیا پانی وگیاں جَمَن چنہائیں
سَروَر سنگ زمینی چُبھی آن ترن ننکانے،
اوہ اکھر اساں کِس کاری دسّو
سوٹی پگّڑ گلی محلہ
موم شمع بن پگھرن اکھوں ڈنڈ مضمُونی کھاڑے
در دربار قصِید کشیدے
دابے اُرد مُعَلّا
مندراں اندر ٹل بن کھڑکن ختم مسِیت مکھانے
خواج سرا معجُون مُقّفےٰ
اطلس خلعت سیج مُسَجّع
دفتر طلب حسابے
ٹائی ٹوپ کَچھ سرکس نِیون
یونیورسٹیاں پھُمن لیکچر
کُھسر پُھسر وِچ رنگ مَحلّاں موچی گیٹ نقارے
اوہ اکھر اساں کِس کاری
دسّو
1- سوال= سوا کے-