نہ رو گُڈئیے ہُن نہ رو
چھیتی چھیتی وڈی ہو
تینوں مہندی وٹنا لائیے جی
میئیں رانجھے نال ویاہیے جی
ماسی رُوں دی پُونی لگدی اے میری گُڈّی
آہو تیری گُڈّی نالے تیرے کھسم دی گُڈّی
جیہڑا آپیں قبر چ وڑ کے ہو رہیائے نِگھا
تے تینوں پوتڑے دھون نوں چھڈ گیائے
ہوراں دِیاں جمّیاں دے
کیہڑے خیال پئی ایں دھئیے
بھولے بھاتساں پئی کرنی اے راکھی
پِچّھوں آن بپاریاں چُگ کھڑنے نیں پُھل کپاہ دے
لوکاںمیلے کرنے لیف تلائیاں لے کے
تُساں کھنگھ سیال لنگھاونے نیں
اینویں ٹیشناں تے پیار نہیں پائی دے
جیہڑے چندرے کم وِچ رِزق دا لاہنجا ہووے
اوتھے دل نُوں چوگ چگائی دی نہیں
کُچھڑ ساڈے کُکھ کنجری دی
دُھر اندر نہیں گاہک بہائی دے
سینے لا لا سکھنے پئی جاوِیں سکرے واری
لہو باہواں وِچ پگھرن نہ دئیں
اُتّوں اُتّوں پُچ پُچ کر دے رہے
وِچوں ہاں دا نہ پنجرہ کھولیا
چالی ورھے میں بال کھڈائے نیں
تے پئی کھانی آں عزت دی روٹی
تیرے جیہی رہندی
تے اَجّ ہو کملی پئی سڑکاں تے پھکڑی لواوندی