پارک دے وڈے لان دے اندر
نِکیاں نِکیاں بُوٹیاں دائریاں چوکھٹیاں وِچ گڈیاں گئیاں نیں
دوالے وڈیاں تکوناں
اوہناں دوالے ہور چکوراں وڈیاں
پورے لان دوالے وڈا باڈر لایا گیا اے
جدوں پُھل لگسن ہور مہینے تائیں
ایہہ سمجھو قالین ایرانی وِچھ جاسی
اکھیاں دے قدماں تھلے،
اجے تے پیا اُنیندائے
جیویں بُڈھیاں بچے اُڑ جُڑ گولے رنگ رنگ دے
دن رات بھواندے گُم اندراں وِچ
دِتے نقشے مُوجب کھول وچھاندے نیں مال کروڑاں دا
وِچوں ڈنگ دا ٹُکّر کماندے نیں
تیویں بُڈھڑے گبھرو بال کئیں
کردے ایتھے نِکی نِکی پئے گوڈی
رنبِیاں نوں بُرش بنا مِٹی وِچ رنگ پئے بھردے نیں
مکِھیاں نیں شہت دِیاں
پتہ نیں چَھلی جیہڑی اساں پئیاں بھرنیاں ہاں
چِھٹ چِھٹ کِھچ رس پُھلاں چوں
ساڈے کم کِسے نہیں آونی