فرید بھنڈار

''سوچیں پئے او

ہور کوئی چن چڑھا تے نہیں آئے؟''

''ماسی سرگھی ولوں پئے آونے آں بھاء شپیا''

''جھاڑ کھاہدی جے؟''

''نہیں، اسیں آکھیا ماسی بتّی گئی ہوئی اے

اَنّھ ہنیرے بیٹھے کیہ پئے پڑھدے او؟''

''جیہڑا دینہہ ویلے نظر نہیں آوندا''

''ہُن کیویں آوندا اے''

''رات دی اپنی بتّی اے''

''اوہ کِتھوں آوندی اے''

''اوہنوں ہر ہر وِچوں لنگھدی تار جگاوندی اے''

''لوا دیو سانوں وی''

''لگی ہوئی جے''

''کِتھے؟ نظر تے آوندی نہیں''

''کیوں پڑھنائے جو پڑھنائے رات دے نال مُکا لؤ

بَل پَوسی''

''ایس رات دے مگروں دینہہ نہیں چڑھنا؟''

''چڑھنائے پر اوہ نہیں جیہڑا بزارے وکدائے''

''ہور کیہڑا''

''جیہنے بند بزار کراونے نیں 

کرنی ہر جی دی

ہر جی اگے دھر کے وچھوڑے مکاونے نیں''

''چاڑھو دینہہ او پھیر

سوچیں کیوں پئے ہوئے او''

''کیویں چاڑھیئے بھاء شپیا؟''

''پُچھیا نہیں سرگھی نوں؟''

''پُچھیا سی آہندی اے آپے سوچو''

''ہس کھیڈو مُڑ گُم سُم کاہنوں ہو گئے او''