فرید بھنڈار

''اوہ پھڑیں اخبار برانڈے وِچوں''

''ایہہ تے دُھپ دی ٹُکڑی اے فرش تے''

''کیہ گل اے اخبار نہیں آئی''

''اجکل چِرکیاں چھپدیاں نیں

کاغذ تے کنٹرول وی ہویا بلیک آوٹ وی ہویا

ساریاں خبراں چھاپنیاں وی نہ ہوئیاں''

''کیوں کوئی گڑبڑ والی گل اے؟''

''نہیں وار اے وار دے وِچ نقصان وی آخر ہوندا ای اے نا''

''اللہ تعالیٰ فضل کرے جی آپنا،

نقصان کیہا تے فائدہ کیہا

مسلمان تے سود وزیاں دِیاں ٹرمز دے وِچ کدیں سوچ ای نہیں سکدا،

اک اعلےٰ و ارفع مقصد اے ساڈا بس باقی ایس جہاں دی ساڈی 

ٹرم اِک عارضی شے اے، اِک امتحان اے ٹرائل اے، فرد دی سفرنگ

فرد دی موت دا آپنے طور تے کوئی مطلب نہیں، فرد اِک قطرہ اے، موج اے

مِلت دے دریا دے اندر''

''میں دسناں اجکل نماز دے اندر اوہ سرور پیا مِلدائے

جیہڑا اگے کدیں نہیں مِلیا

آوں لگدائے دروازے کُھلے ہوئے نیں رحمت باری دے''

''سائرن ہویائے اندر آجاؤ''

''آونے آں آونے آں''

''چلو جی جانا ای چاہیدائے ایہہ وی ضروری چیز اے آجاؤ آجاؤ''

''بئی گل ایہہ اے

مسلمان تے میں نہیں ایڈا

پر میرے اندر پرسنل پرائڈ ضرور اے

میں مرن تُوں ڈرن نوں آپنی ہتک سمجھناں''

''آپنے مرن تُوں کوئی نہیں ڈردا

بس پچھلیاں دا کُجھ خیال ڈراوندائے''

''آؤ جی آل کلیئر آ جاؤباہر''

''آؤجی آل کلئیر؟ فون تے پُچھ لئو''

''نہیں میں سائرن سُنیائے''

''پُچھ لئو پھیر وی پُچھن وِچ کیہ ہرج اے''

 “آؤ جی باہر بیٹھیئے

لئو جی چنگی بھلی اخبار اے

کہندائے دُھپ دی ٹُکڑی اے"

''کیوں بئی دُھپ دی ٹُکڑی نہیں سی

ایہہ تے ہُن آئی اے

اوہ کِھلر پُلر گئی اے برانڈے اندر''