کیہ دَسیئے
جدوں دے تُسیں گئے او
کم کار تے دُگنے چوگنے نیں
لہور کیہ اے جو ساڈے کول کوئی نہیں
بھاء جی
آہندے ہوندے سَو تُسیں انقلاب آونائے
ہیٹھلی اُتانہہ ہو جاونی اے
ساڈے بھاء دی ہو گئی جے کیہ دَسیئے
دوئے بَھیناں نیں سونکناں
آہمو ساہمنے چونک چ بہندیاں نیں
توبہ جِیبھ سَڑ جائے
متے کوئی بُزرگناں تارکاں ہون
دینہہ رات ساڈے اندر رہندیاں نیں
ہتھ دھر کنِیں پئیاں کہندیاں نیں
"پاپِیا
وڈھ ہتھ ہتھیار گُناہی آپنا
کورا لٹھا ہو جا
نِکل دِین دے ناں تے جان دے دے
پَھٹے چاڑھ دے جیہڑا وی کُسکدا اے
جیہڑا نِکلیائے واڑ دے
روڑھ دے گند سارا"
اوہلے سد نالے
اکھاں ہور دِیاں ہور کر دِسدِیاں نیں
ماں نوں ماں نہیں
بھین نوں بھین نہیں ایہناں نے رہن دِتا
جھات انِھیاں تاکِیاں ہسدیاں نیں
آپاں کُسکدے نہیں
باہیں ٹُنڈیاں مِرچ لبیڑ ڈنڈے سانوں چاڑھ اُتوں پیچ کسدِیاں نیں
ڈھیر سُتھناں عرش توں فرش تائیں
توبہ جِیبھ سڑ جائے
ہووے بھیت کوئی
گل کرن دا امر وی ہے کہ نہیں
بھاء جی
واپس خیر نال جاؤ
تہانوں نال اینویں گُنہ گار کرئیے
آہندے ہوندے سو تُسیں "انقلاب آونائے
اندر باہر سبھ اِک ہو جاونا اے"
سوئیو ہو گیا جے
آہندے ہوندے سو تُسیں
"ساڈا کم کیہ اے
انقلاب دے خاب دینا"
چنگے رہے او آپنا آپ لے گئے
نالے خاب لے گئے
باراں ورھے ہو گئے آپاں جاگنے آں
متے اکھ لگے کیہ دا کیہ ہو جائے