چَھتّی گلی وِچ بیٹھک ہے سائیں تاج دی
بیٹھک ہی اکھواندی اے گھر وی اوہا ای اے،
چھتّی گلی جتھے مُکدی اے
اوتھے میدان اے نِکا جیہا
چُگان اوہنوں آہندے نیں،
وڈے وڈے مکان دوالے،
فرش چُگان دا نانک شاہی اِٹاں
وکّھی پرنے گڈیاں،
چُگان چَونک وی اے
تِن ہور وی گلیاں ایہدے وِچ کُھلدیاں نیں،
ایہہ مشہور اے ایس چُگان دے پِچھے گل ہے کوئی
سائیں تاج نوں پتہ اے
دسدے کِسے نوں نہیں،
وڈیاں ایہناں دیاں ایہہ پایا چُگان چُغَتّیاں ویلے
یا چُغَتّیاں پوایا ایہناں دیاں وڈیاں کولوں،
چُگان تے کھیڈ آہی
جیہنوں ہُن پولو آکھدے نیں
شاہی اسوار کھیڈیندے آہے کُھلیاں میداناں اندر
'قطب الدین اَیبک وی کھیڈدا اوہو لہور وِچ مویا،
سَوکھا گھر سی ساڈا
ابے میرے دا کاروبار سی چنگا
بَیٹھکی اوہ وی سی
1- نِیتگ= سیاسی- 2-کمیر= کاما، ورکر-
نِکا جیہا ساں نال مینوں اوہنے لے جانا،
گل میں جیہڑے ویلے دی کرن لگا تدوں ایم اے وِچ ساں کالج
نال تیاری سِوَل سروس دے امتحان دی
مقابلے دا امتحان تدوں کہندے سن
پیو بھراواں چاچیاں مامیاں ایہو نشانہ دِتا ہویا سی مینوں
آپ تے سارے کاروباری سن،
ہاں جی گل چُگان دی:
لؤ جی پچُھیا میں اِک دن سائیں تاج نوں
''سائیں ایہہ کیہ بھیت اے لوک جو گلاں کردے نیں''
ہُوں ہاں کردے اُٹھ کے اوہ ٹُر گئے
میں شامی مُڑ پچُھیا
''سویرے سہی یار'' اوہ ٹال گئے،
چھڈنا تے میں وی نہیں سی
سویرے مُڑ جا پچُھیا
پے نہ گئے مینوں اگوں:
دفع ہو جا اوئے
شکل نہ مُڑ ایہہ ویکھاں میں ایتھے،
میں بیٹھا رہیا سِر سٹ اوہ اُٹھ کے اندر ٹُر گئے
بندوق پُرانی مُغل وارے دی کڈھ نہ لیائے،
سوچاں چل تے ایہہ سکدی نہیں
سر میرے وِچ کڈھ نہ مارن
ہن تے تگڑے اجے وی
جُون چوراسی بھاویں چروکنے ٹپ گئے ہوئے نیں،
''میں تینوں مارن لئی نہیوں آندی
وعدہ لین تیرے کولوں آیاں
مراں جدوں میں
قلعے عجائب گھر اے جیہڑا اوتھے ایہہ رکھوانی اے تُوہِیوں''
''مال روڈ والے وڈے عجائب گھر وِچ کیوں نہیں سائیں''
''کیوں اوہ بے بے تیری دے یار دائے؟''
دِل وِچ آئی آکھاں
قلعے والا کیہدی بے بے دے یار دائے،
ہاسا روک میں بیٹھا ہویاں
ویکھ میرے ول آہندے نیں ''پچُھدا کیوں نہیں
پچُھ اوئے، قلعے والے وِچ رہندا سی کوئی یار تاج دی بے بے دا
جیہدی بندوق دا اوہدے پِچھے ٹُھکن ضروری ہویا اے؟
اوئے پچُھن تیرا ایس گشتی نوں بندا ای
'کِنّے مارے نی
کیہدے کیہدے کولوں وجدی آئی ایں بَھینے میرئیے
ایہہ بیٹھک کوٹھی خانہ کدوکا پا بیٹھی ایں
تاجُو ایہہ دلّا تیرا اے جدّی؟
وڈکے ایہدے تیری کمائی کھاندے جُھڈُو چندر بنسی ہوئے
ایہہ بتؤوُا تیرا سائیں ہُن ہویائی چندرا'' ‘
ہاسا رُکے نہ میرا،
لوکیں ہور وی آ گئے
چَنڈ کِسے نوں چُمی کِسے نوں
جَپھی دَھپّھہ جِھڑک دلاسہ سبھ کُجھ رَلیا گُھلیا
ہیٹھو ہیٹھ اِک ڈوری کُولی
گالھ گوٹ دے اُپروں کُھلدی
اوپریاں نوں وِچ اپنیت پروندی آوے،
کُجھ چِر بہہ کے کر سلام میں اُٹھیاں
''جا دفع ہو
وڑ جیہڑی رُڈھ وِچوں نِکل کے آیائیں اوتھے''
اگلے دن میں ویلا تاڑ کے گیاں بیٹھک وِچ
کلّے ای سن اجے
''اوئے آ گیائیں بھیڈوا
سِنگ پُوچھل وِچ لُکائی پِھرنائیں،
چل پہلے گاون سُنا کوئی سَٹے قوال دِئیے''
''کافی سُناواں مادھو لال حسین دی؟''
''پیا دے کافی
تیرے ہتھوں شراب تے نہ میں پیتی کُھسریا
کالج وِچ انعام ایسے تے لیا سائی؟''
''نہیں غزل سی اوہ اقبال دی''
کِھڑ کِھڑ ہسے
''پُج مِیسنا کاریگر جے بئی''
میں کافی سُنائی:
دِن چار چوگان میں کھیل کھڑی
ویکھاں کون جِتے بازی کون ہارے
گھوڑا کون کا چاک چالاک چالے
ویکھاں ہاتھ ہِمت کر کون ڈارے
ایس جِیو پر بازیاں آن پڑیں
ویکھاں گوءِ میدان میں کون مارے
ہائے ہائے جہان پُکارتا ہے
سمجھ کھیل بازی شاہ حسین پیارے،
سُن کے روون ہاکے جیہے ہوئے سائیں کُجھ چِر،
پھیر ہس کے آہندے نیں:
''تینوں چُگان نہیں چھڈدا شاہِینا
جھپٹ پلٹنا پلٹ جھپٹنا،
چَوڑ چپَٹ گلاں نوں بھیت بنا کے
خلق دی مت نہ مارے ایہہ دُنیا
تے اپنی موت سہیڑے؟
چُگان اوہ شاہاں دے
پکے فرش کرا کے ہٹ بزار ہوئے،
آکھ نہ پیو نوں چابک سوار چالاک اپنے نوں
گھوڑا چھڈیائے جیہنے چُگانے پُتر دا
ٹرافی لین لئی
ویکھے ایہنوں جہان تے ہائے ہائے پُکارے،
بھیت پتہ کر ہائے ہائے دا
ایہہ واہ واہ ہوندی سائی
شہنشہاں دے ویلے چُگاناں اندر،
کیہ سُنی پُکار جہان دی لال حسین نے ایہدے وِچوں؟
آکھ پیو نوں سُنے
تینوں سنوائے،
دِسّے اَن چھتی گلی اوہ تینوں
نکل چُگاناں ایہناں وِچوں پریم نگر کے شہر نوں جیہڑی جاندی اے،''
اُٹھ کھلوتے تاج سائیں
عجب رنگ دی سہج دھمال اوہ پاون لگ پئے
ہَولی ہَولی پیر چاون
ہَولی ہَولی لاون زویں تے
سہجے لِف اُسرن
سہجے بانہہ الار نِواون
نال اینا ای گاون ہَولی ہَولی
'اب ہم گُم ہوئے
ہائے
اب ہم گُم ہوئے،
جیویں سویر پئی ہووے
آوے رات پئی،
میں تکناں کھلا
سہج سبھائیں رلیاں
بڈھڑا نکڑا جیہڑا آیائے رلدا گیائے،
لہر جیہی کوئی اندروں اُٹھی
تان میں لائی
'اپنے آپ نوں سودھ رہیا ہوں'
واج سائیں دی آئی:
نہ سِر ہاتھ نہ پیر،
رل پئے سارے
اب ہم اب ہم پریم نگر کے شہر،
لہر اوہ بوہڑی
'خودی کھوئی اپنا پد چِینا'
سائیں رلے مُڑ 'تب ہوئی کُل خیر'
'اب ہم اب ہم'
'بُلھا شوہ ہے دوہیں جہانیں
کوئی نہ دِسدا غیر'
اب ہم اب ہم گُم ہوئے پریم نگر کے شہر'
بیٹھک بیٹھک نہ رہی
تاج سائیں جو آہے سو آہے
اساں ہور دے ہور ہوئے
سول سروس تے پِچھے رہ گئی
بنیاں پارٹیاں
بن بن ٹُٹدِیاں آئیاں
لگی لوء جیہڑی اوس گھڑی
اکھیاں دھوندی آئی
میلی آپ جاں ہوندی جاپی
اوسے گھڑی دھوائی