فرید بھنڈار

باہرلے پاسے تاکی دے

پر اِک اَڑیا ہویا اے،

کاہدے نال؟

کول ہو ویہناں

تنی اے جالے دی،

واء اُڈا آندا اے کِدھروں

جوڑ اِتھائِیں گئی اے،

پر ایہہ چِڑی دا تے نہیں

بھورا وڈیرا جاپدا اے،

لالی شارک دا وی نہیں

نہ ای گُھگی کبُوتری دا،

رنگ ایہدا کُجھ چِٹا کالا جو ہویا،

ہاں کاں کانوڑی دا نہ ہووے خبرے،

ہَلدا تھرکدا واء وِچ گُھمن گھیر گھتیندا

مینڈے گویڑ تُنَکدا اے،

''تُوں وی تے پَر ہیں

جَھڑ جُڑیا اَدِسنی تار کِسے نال

تاکی دے اندرلے پاسے،

ہَل تَھرک وی تینڈی مینڈی

کُجھ کُجھ وکھری سانجھی،

بجُھ، ہاں وار1 کیہڑی دی بھانجی2 ہاں تُوں میں''

1- وار= 1) تاریخ، ہسٹری، دِن، دیہاڑ- 2- بھانجی= بھاجی= حِصہ، بھاگ، سِیر-