''کیوں سَید میر
اج تہاڈیاں اکھاں وچ اداسی کیوں اے''
''یا قبلہ تسیں طبیب او قلب و نظر دے
کیہ دسّیے
اسیں ٹِل لا بیٹھے آں بُن دا
ایہہ لوک نہیں سُندے
جو کجھ تسیں سکھایائے مرشد
اوہو آکھیدائے
تساں جیہڑے حرف عطائے
سر دھڑ دی بازی لا کے اساں پکائے
جِیبھ سڑے تِل تولہ جے ودھ گھٹ کردے ہوئیے
کُتِیاں بُڈِھیاں
بُڈھڑے گبھرو بال چمُونے
مُڑ گِھڑ ایہو پچھدے نیں سارے بُنڈڑ کُھرکدے:
'مولبی جی اسمان تے لالی کیہی اے'
بتھیرا آکِھیدائے:
میاں سُنیا نہیں جے
صدیاں چودھویں مُک گئی' چڑھ پئی پندھرویں
ہُن چل سو چل اے
سورج نیزا جھب جھب نیڑے ڈُھکسی
چُٹسی عمل تہاڈے
میاں سُندیاں گِندیاں بولے بدل بنے رہو تے وکھری گل اے
ایہہ لالی بُرخائے قہر غضب دا
پچھے مِہر مہر دا لُکیائے
جد جھڑسی مونہاں اتوں کالکھ عملاں دی
آپے ظاہر جھروکے چڑھ کے درشن دیسی کرماں والا
ایہہ چھیکڑ ویلائے میاں
نتارے ہوسن پور پور دے
عضو عضو دا لیکھا ہوسی
کجھ تَر وَیسن کوجِھیاں مرشد مَنِّیاں
رہندیاں چھیکیاں جاسن بدعت ساج سنگھاریاں
ایہہ ماہ رمضان اے یا قبلہ
وڈے نڈھے چائیں چائیں
آن تراوی نیت کھلوندے نیں پچھے
تکبیر آکھ کے گن مشین اساں چَھڈ دئی دی اے
کیہ کرئیے پر مرشد سچا
پَچدی نہیں اکھاں دی بے اتباری
پچھوں سجدے ڈھیندیاں
مگرے اٹھدیاں بہندیاں صفاں چوں
ایہو اوازا آوندائے:
'ادھا پہر ہو گیائے سورج ڈبیاں
ساؤن دی پہلی ہو گئی اے
بُک بُک کِھڑے نیں موتیا تارے
ایہہ لہندیوں لالی سُکدی کیوں نہیں مولبی جی'
یا قبلہ
یاں تے ساڈیاں جِیبھاں سان چڑھاؤ
یاں ایہناں دے کن پاڑو ویہڑکیاں دے
بس ہو گئی جے ساڈے والی''
''نہیں سَید مِیر
اجے کُجھ نہیں ہویا
دل سَوڑا نہ کر بچیا
ویکھن دے نیں لالی
ایہہ تپّہ ای تُھلنا پوسی
ویکھ تے سہی توں
نہیں تیری جیہڑے سُندے کجھ نہ سُنسن
کجھ نہ تکسن
اکھاں ایہناں دیاں سپّنیاں
ایہناں دا وی دوش نہیں
کملیاں بے مرادیاں دا
ایہہ تپہ ای کلّر شور اے
اسیں ایتنیاں پِیڑھیاں
ایتھے کَنّاں دے کَن دا چَھٹّا دیندے ہُٹے آں
ایتھے بھوں چوں اکھاں ای اُگدیاں نیں
جدوں ہیٹھ ہاوئیے ٹھونہیاں نِسّل کیتا
جُفتی کن کھجوریاں کیتی
تدوں لگ پتہ لالی دا جاسی
ڈھیکیاں نوں
مینوں اوہناں نالوں تہاڈا فکر ودھیرائے
سَید میر مینڈا بچڑا
اساں تہانوں کَن بنایا
مُڑ جِیبھ بنا لمکایا مُلکھ دے کنّیں
پر تہاڈیوں اندروں
ایس تپّے دی پُٹھ جماندروں نہیں نہ مَردی
لوکاں دیاں تسیں اکھاں ویکھن لگ پوندے او
کم آپنا بُھل کے''-
''فکر نہیں یا قبلہ
سانوں پَک اے
جتھے ہوساں مرشد تساں وی اوتھے ہو سو
تساں وی ساڈی عرض سُنن توں اگدوں
ساڈیاں اکھاں وچ اداسی بھالی اے''
''سچ آہندے او بچڑا
سَید مِیر مینڈا مٹھڑا
جھب آہر کرو
پتھلّو ایہنوں
متاں نال ای لے کے بہندا جے سانوں سبھ نوں ایہہ تپّہ چندرا''