گل پُرانی پئے کرینے آں
مَتے پِچھلی کِیتی پئے دُہرینے آں
ہُنے ہُنے آئے سُنن والیاں لئی،
اوس ویلے جد وڑنا دِلّی دروازے
تے اگے لمّا بزار کتاباں دا ہونا
کِتے موٹیاں جِلداں بن ٹھن ٹُھک کھلوتیاں
ہونیاں خانیاں الماریاں اندر،
کِتے تھڑے تے ہونیاں لمیاں ڈھیر پئیاں
دس ویہہ اخباری کاگت جوڑ سِیتیاں،
ایویں ای ریڑھیاں ہونیاں
کتابِیں لدیاں
ہَولی ہَولی اگے پِچھے پھیری لاندیاں،
دروازے باراں تیرھویں موری
کھلوتا وِکری تے ای آہا شہر لہور تدوں وی
پر ہر دروازے وِکنیاں وستاں وکھو وکھریاں،
ہُن تے لگدائے سبھ دروازے اِکّو ای نیں
سبھ ہٹیاں تے سُوٹ بُوٹ
تے سَودا ہور سُکھالیاں گھراں لئی،
پَیدلاں دی ہیڑ دے وِچو وِچ ای
وگی آوندی اے ریڑھ موٹر سائیکلاں دی،
وِچ وِچ وڈِیاں کاراں وی نیں،
خبرے اِیویں ای زہر قہر قدِیمی
پہرو پہریں رنگ وٹائی آیا اے