کنیاں ساونیاں
تارے جھڑے اسمانوں سَپ سپولڑیاں
ہزاراں سال جیہڑے تساں مِدھ ڈانگاں نال مارے
رَڈھاں وِچ جیہڑے بال پِھسے
جدوں اُسرے محل منارے
کَنیاں ساونیاں
گَج اسمانوں لتھیاں ہاتھی ہستنیاں
جُگاں بدھی تساں گھت سندھور لڑائیاں جو
وِچ راہاں دے سیجاں ورگے ساج کے ٹوئے پھاہیاں جو
تساں ڈھائے مُلک، بنائے
ہودیاں اُپر جھول پڑاں وِچ آتر پُت کھپائے
وکھیاں وِچ نِت آنکس رکھ سِدھائیاں جو
کنیاں سمجھی آؤ
سُنڈاں کر پھنیئر متاں خاباں وچ لمکاون
کنیاں سمجھی آؤ
حُکم کرو ایہہ وتر پُورا لاون
ٹُکر ڈِھڈ وِچ پوے تاں فوجاں لڑدیاں نیں
بُھل جاؤ
دُھوکھ گھنیری دُھکھے گھٹائیں چڑھدیاں نیں